மொனறாகலவில் கிளைமோர்த் தாக்குதல்: சிறிலங்கா படைத்தரப்பைச் சேர்ந்த ஒருவர் பலி- 3 பேர் படுகாயம்.!!

[திங்கட்கிழமை, 04 பெப்ரவரி 2008] சிறிலங்காவின் மொனறாகல மாவட்டத்தின் புத்தல காட்டுப்பகுதியில் சிறிலங்காப் படையினர் பயணித்த உழவூர்தியை இலக்குவைத்து இன்று பிற்பகல் நடத்தப்பட்ட கிளைமோர்த் தாக்குதலில் படைத்தரப்பைச் சேர்ந்த ஒருவர் கொல்லப்பட்டுள்துடன் மூவர் படுகாயமடைந்துள்ளனர். புத்தல காட்டுப்பகுதியில் உள்ள கலகே என்ற இடத்திலேயே இக்கிளைமோர் தாக்குதல் இன்று திங்ட்கிழமை பிற்பகல் 2:30 மணியளவில் நடத்தப்பட்டுள்ளது. புத்தல காட்டுப்பகுதியில் தேடுதல் நடவடிக்கையில் ஈடுபடும் படையினரை ஏற்றிச் சென்ற உழவூர்தியை இலக்கு வைத்து இத்தாக்குதல் நடத்தப்பட்டிருப்பதாக அம்பாந்தோட்டை மாவட்டத்துக்கான கூட்டுத்தளபதி சுசந்த ரணசிங்க தெரிவித்துள்ளார். "கிளைமோர்த் தாக்குதலில் படுகாயமடைந்த படையினர் கதிர்காமம் மருத்துவமனைக்குக் கொண்டு செல்லப்பட்டுள்ளனர். அப்பகுதியில் தேடுதல்களை தீவிரப்படுத்தப்பட்டுள்ளன" என்றும் அவர் கூறினார். மொனறாகல புத்தல காட்டுப்பகுதியில் அண்மைக்காலமாக தாக்குதல்களை நடத்தி வருகின்றனர் எனக் கருதப்படும் புலிகளின் சிறிய அணி ஒன்றுதான் இத்தாக்குதலையும் நடத்தியதாகவும் அம்பாந்தோட்டை சிறிலங்கா காவல்துறையினர் தெரிவித்துள்ளனர். இதனிடையே கொழும்பின் புறநகர்ப் பகுதியான மொறட்டுவவில் உள்ள குப்பைமேடு ஒன்றிலும் சிறிய குண்டு ஒன்று வெடித்திருப்பதாக மொறட்டுவ காவல்துறையினர் தெரிவித்தனர். எனினும் குண்டுவெடிப்பால் எவருக்கும் பாதிப்பு ஏற்படவில்லை. குண்டுவெடிப்பை அடுத்து அப்பகுதியில் தேடுதல் நடத்திய சிறிலங்கா காவல்துறையினர் சந்தேகத்தின் பேரில் இளைஞர் ஒருவரை கைது செய்தனர்.