முதல்வர் கருணாநிதியின் அரசியல் வாரிசாக யார் வர வேண்டும்? கருத்து கணிப்பை கண்டித்து நாளிதழ் அலுவலகத்திற்குள் குண்டு வீச்சு; 3 ஊழியர்கள் பலி.!!

[புதன்கிழமை, 9 மே 2007]

மதுரை: நாளிதழ் ஒன்றில் வெளியான கருத்து கணிப்பை கண்டித்து தி.மு.க,வினர் மதுரையிலுள்ள அதன் அலுவலகத்திற்குள் பெட்ரோல் குண்டுகளை வீசினர். இதில் 3 ஊழியர்கள் பலியாகினர். முதல்வர் கருணாநிதியின் அரசியல் வாரிசாக யார் வர வேண்டும்? என்று கருத்து கணிப்பை அந்த நாளிதழ் வெளியிட்டது.

தமிழக அளவில் ஸ்டாலினுக்கு 70 சதவீதமும், அழகிரிக்கு 2 சதவீதமும், அதில் மதுரை மக்கள் 67 சதவீதம் பேர் ஸ்டாலினுக்கும், 6 சதவீதம் பேர் அழகிரிக்கும் ஆதரவு அளித்துள்ளதாக தெரிவிக்கப்பட்டிருந்தது. இதை கண்டித்து மதுரையின் பல்வேறு இடங்களில் தி.மு.க.,வினர் நாளிதழை எரித்து தொடர் மறியல்களிலும், வன்முறைகளிலும் ஈடுபட்டனர்.

சம்பவத்தின் போது கல்வீச்சில் 8 பஸ்கள் சேதமடைந்தன. இதனால் மதுரை மேலுõர் ரோட்டில் உத்தங்குடியில் உள்ள அந்த நாளிதழ் அலுவலகத்திற்கு ஊமச்சிக்குளம் டி.எஸ்.பி., ராஜாராம் தலைமையில் போலீஸ் பாதுகாப்பு போடப்பட்டது. காலை 11 மணிக்கு மதுரை கீரைத்துரையைச் சேர்ந்த அட்டாக் பாண்டி தலைமையில் 10 பேர் கொண்ட தி.மு.க.,வினர் சுமோ காரில் அந்த அலுவலகத்திற்குள் புகுந்தது. உள்ளே புகுந்த அவர்கள் செக்யூரிட்டி அறையை தாக்கிவிட்டு, அருகில் நிறுத்தப்பட்டிருந்த 3 இருசக்கரவாகனங்களுக்கு தீ வைத்தனர். பின்னர் அலுவலகத்திற்குள் அவர்கள் பெட்ரோல் குண்டுகளை வீசியதில் வரவேற்பு அறை முழுவதும் தீக்கிரையாகின. அச்சக அறைக்கு சென்றவர்கள், பேப்பர் ரோல்களுக்கு தீவைத்தனர். ஊழியர்கள் உடனடியாக தண்ணீரை ஊற்றி அணைத்ததால் பெரும் தீ விபத்து தவிர்க்கப்பட்டது.

அலுவலகத்தின் கடைசி பகுதியில் உள்ள ஜெனரேட்டர் அறைக்கும் தீ வைக்கப்பட்டது.

இதற்கிடையே 5 பேர் இரும்பு ஏணிப்படிகளில் ஏறி மேல்தள அறைகளில் பெட்ரோல் குண்டுகளை வீசினர். இதில் கீழக்கரையைச் சேர்ந்த கோபி(25), மதுரையை சேர்ந்த வினோத்குமார்(23) ஆகியோர் இருந்த கம்ப்யூட்டர் அறையிலும் பெட்ரோல் குண்டை வீசிவிட்டு தப்பி ஓடினர்.

எட்டு தீயணைப்பு வண்டிகள் மூலம் தீ அணைக்கப்பட்டது. இதன்பிறகும் தீ அணையாததால் தனியார் தண்ணீர் வண்டிகள் கொண்டு வரப்பட்டு தீ அணைக்கப்பட்டது. இதற்கிடையே கோபி, வினோத்குமாரை காணவில்லை என்று ஊழியர்கள் தேடியபோது புகையால் மூச்சுத்திணறி இருவரும் இறந்திருந்தனர். அங்கு வந்த மதுரை டி.ஐ.ஜி., கலிமுல்லாகான், மாவட்ட எஸ்.பி., அன்பு ஆகியோரை முற்றுகையிட்டனர்.

அந்த ஊழியர்கள் மதுரைமேலுõர் ரோட்டில் மதியம் 12 மணியளவில் மறியலில் ஈடுபட்டனர். ன்முறையில் ஈடுபட்ட அட்டாக் பாண்டி, சரவணன், கோபி ஆகியோரையும், இச்சம்பவத்திற்கு காரணமானவர்களையும் கைது செய்ய வேண்டும் என அவர்கள் கோஷமிட்டனர். மாலை 3.30 மணியளவில் எஸ்.பி., அன்பு, நடவடிக்கை எடுக்கிறேன். கலைந்து செல்லுங்கள் என்று கூறியதை ஊழியர்கள் ஏற்க மறுத்ததால் மதுரைமேலுர் ரோட்டில் 4 மணி நேரத்திற்கும் மேலாக போக்குவரத்து பாதிக்கப்பட்டது.

இந்நிலையில் மாலை 4 மணியளவில் தனியார் செக்யூரிட்டி நிறுவனத்தை சேர்ந்த முத்துராமலிங்கத்தை காணவில்லை என ஊழியர்கள் தேடினர். மாலை 4.40 மணியளவில் மூச்சு திணறி இறந்த நிலையில் அவரது உடல் அந்த அலுவலகத்திற்குள் கண்டெடுக்கப்பட்டது. அவரது உடலை மேலுõர் ரோட்டில் வைத்து ஊழியர்கள் ரோடு மறியலில் தொடர்ந்து ஈடுபட்டனர்

dinamalar.com