முல்லைத்தீவில் பொதுமக்கள் ஊர்தி மீது கிளைமோர் தாக்குதல்.

[செவ்வாய்க்கிழமை, 6 மார்ச் 2007]

முல்லைத்தீவு மாவட்டம் மல்லாவி பாலைப்பாணி மார்க்கத்தில் சிறிலங்கா இராணுவத்தினரின் ஆழ ஊடுருவும் அணியினர் பொதுமக்கள் ஊர்தி மீது கிளைமோர் தாக்குதல் நடத்தியுள்ளனர்.

இன்று செவ்வாய்க்கிழமை மாலை மல்லாவியிலிருந்து பொதுமக்களை ஏற்றிக்கொண்டு பாலைப்பாணி நோக்கிச் சென்று கொண்டிருந்த ஊர்தி மீதே இக்கிளைமோர் தாக்குதல் நடத்தப்பட்டுள்ளது.

இத்தாக்குதலில் ஊர்தி சேதமடைந்துள்ளது. பொதுமக்களுக்கு எதுவித சேதங்களும் ஏற்படவில்லை என அங்கிருந்து கிடைக்கும் தகவல்கள் தெரிவிக்கின்றன.

இதனிடையே வன்னிப் பகுதியில் சிறிலங்கா வான்படைக்குச் சொந்தமான மிக் - 27 ரக விமானங்கள் இன்று மாலையும் வான் தாக்குதலை நடத்தியுள்ளன.

இன்று செவ்வாய்க்கிழமை மாலை 5.30 மணியளவில் விமானங்கள் குண்டுவீச்சுத் தாக்குதலை நடத்திவிட்டுச் சென்றுள்ளன.

இது இவ்வாறிருக்க, முகமாலை பின்தளத்திலிருந்து சிறிலங்காப் படையினர் செறிவான எறிகணை வீச்சுத் தாக்குதலை நடத்தியிருக்கின்றனர்.