'எமது படையினரின் தாக்குதலால் பிரபாகரன் தப்பியோடுவார்': சிறிலங்கா அமைச்சர்.

[செவ்வாய்க்கிழமை, 6 மார்ச் 2007]

"பிரபாகரன் நாட்டை விட்டு தப்பியோடும் அளவுக்கு எமது படையினர் பதில் தாக்குதல்களை நடத்துவர்" என்று சிறிலங்கா சுதந்திரக் கட்சியின் பொதுச் செயலாளரும் அமைச்சருமான மைத்திரிபால சிறீசேன தெரிவித்துள்ளார்.

பிலியந்தலையில் நடைபெற்ற நிகழ்வில் கலந்துகொண்டு உரையாற்றுகையில் அவர் மேலும் தெரிவித்துள்ளதாவது:

"அரசாங்கம் தேர்தலை நடத்தப்போவதில்லை. எமக்கு பலமான அரசாங்கம் இருக்கின்றது. அதனால் அனைத்து சக்திகளும் நிபந்தனைகளை விதிப்பதை கைவிட்டு விட்டு அரச தலைவரின் தலைமைத்துவத்தின் கீழ் ஒன்றுபட வேண்டும்.

அரச தலைவரின் தலைமைத்துவத்தின் கீழ் நாம் 15 மாதங்களைக் கடந்து விட்டோம். 2001 முதல் 2004 வரை ரணிலின் அரசாங்கம் மேற்கத்தேய நாடுகளுக்கு சார்பாகவே நடந்து கொண்டது.

எந்த பிரச்சினை இருந்தாலும் நாட்டின் பிரதான பிரச்சினையான யுத்தத்திற்கும் பயங்கரவாதத்திற்கும் தீர்வைக் காண்பதற்கு அரச தலைவர் தற்போது முன்னெடுத்திருக்கும் நடவடிக்கைகள் சரியானவை என்று மக்கள் மத்தியில் கருத்துக்கள் நிலவுகின்றன. பிரபாகரன் நாட்டை விட்டு தப்பியோடும் அளவுக்கு எமது படையினர் பதில் தாக்குதல்களை நடத்தி வருகின்றனர்.

வடக்கு - கிழக்கு பிரச்சினை தொடர்பான எமது அணுகுமுறை மிகவும் வெற்றிகரமான பாதையை நோக்கி பயணித்துக் கொண்டிருக்கின்றது. சிலர் நாம் தேர்தலுக்கு தயாராகி வருவதாகக் கூறுகின்றனர். சிலர் நாம் விடுதலைப் புலிகள் மீது தேவையற்ற தாக்குதல்களை நடத்தி வருகின்றோம் என்று கூறுகின்றனர்.

வரலாற்றில் முதல் தடவையாக எதிர்க்கட்சியிலிருந்து 18 பேர் ஆளும் கட்சிக்கு வந்துள்ளனர். எமக்கு இப்போது நாடாளுமன்றத்தில் 121 பெரும்பான்மை பலம் இருக்கின்றது. ஜே.வி.பி இந்த ஆண்டை எதிர்ப்பு ஆண்டாகப் பிரகடனப்படுத்தியுள்ளது. இந்த எதிர்ப்பை மக்களால் தெரிவு செய்யப்பட்ட அரசாங்கத்திற்கு எதிராகவே அவர்கள் மேற்கொண்டு வருகின்றனர் என்பதை மறந்து விடக் கூடாது" என்றார் அவர்.