'தமிழீழப் பெண்களுக்கு தலைநிமிர்வை ஏற்படுத்தியவர் தேசியத் தலைவர்'

[வியாழக்கிழமை, 8 மார்ச் 2007] "தமிழீழ தேசியத் தலைவர் அவர்களே தமிழீழ பெண்களுக்கு தலைநிமிர்வை ஏற்படுத்தியவர்" என்று கிளிநொச்சி மாவட்ட பெண்கள் அமைப்பைச் சேர்ந்த சூரியகுமாரி இராஜேந்திரன் தெரிவித்துள்ளார். கிளிநொச்சி பண்பாட்டு மண்டபத்தில் இன்று வியாழக்கிழமை அனைத்துலக மகளிர் நாள் நிகழ்வு நடைபெற்றது. இந்நிகழ்வின் நிகழ்வின் ஆரம்பத்தில் முதன்மைச் சுடரினை கிளிநொச்சி மாவட்ட அரசியல்துறைப் பொறுப்பாளர் கலைவாணன் ஏற்றி வைத்தார். தமிழீழ தேசிய கொடியினை கிளிநொச்சி மாவட்ட நிர்வாக சேவையின் நிர்வாகப் பொறுப்பாளர் இராதை ஏற்றி வைத்தார். கருத்துரைகளை, கிளிநொச்சி புனித திரேசா பெண்கள் கல்லூரி முதல்வர் திருமதி ஜெயந்தி தனபாலசிங்கம், கிளிநொச்சி மாவட்ட அரச, அரசசார்பற்ற நிறுவனங்களின் இணையத் தலைவர் இ.கணேசபிள்ளை ஆகியோர் நிகழ்த்தினர். பெண்களின் கலை நிகழ்வுகள் இடம்பெற்றன. கிளிநொச்சி மாவட்ட பெண்கள் அமைப்புக்களினால் ஒழுங்கு செய்யப்பட்ட இந்நிகழ்வில் நூற்றுக்கணக்கான பெண்கள் கலந்துகொண்டு தமது எழுச்சியை வெளிப்படுத்தினர். இந்நிகழ்வில் உரையாற்றிய சூரியகுமாரி இராஜேந்திரன் மேலும் தெரிவித்துள்ளதாவது: "உலகில் பெண்கள் பல அடக்குமுறைகளை எதிர்கொண்டு வருகின்றனர். பெண்கள் தமது உரிமைகளை வெளிப்படுத்தக்கூடிய நாளாக இன்றைய நாள் அமைகின்றது. தமிழீழப் பெண்களைப் பொறுத்த வரையில் நீண்டகாலமாக அடக்குமுறைகளை எதிர்கொண்டிருந்தாலும் எமது தலைவர் தலைமையிலான விடுதலைப் போராட்டம் தமிழீழ பெண்களுக்கு தலைநிமிர்வையும், எழுச்சியையும் ஏற்படுத்தியுள்ளது. தமிழீழத்தில் ஆண்களும், பெண்களும் சரிசமமாக வாழ்கின்ற சூழல் ஏற்பட்டுள்ளது. அதேபோன்று களமுனைகளிலும் பெண்கள் தீரத்துடன் போராடி வருகின்றனர். பெண்களின் எழுச்சிக்கு எமது விடுதலைப் போராட்டம் ஒரு உந்துசக்கதியாக உள்ளது. தற்போது ஏற்பட்டுள்ள சூழ்நிலையை பெண்கள் பலத்துடன் எதிர்கொண்டு, சவால்களை முறியடித்து, நல்ல எதிர்காலத்தை அடைய உறுதியெடுத்துக்கொள்ள இன்றைய நாள் வழி வகுக்கின்றது" என்றார் அவர்.