கட்டுநாயக்க விமான நிலைய தாக்குதலை திட்டமிட்டவர் கைது.

[புதன்கிழமை, 7 மார்ச் 2007] சிறிலங்காவின் அனைத்துலக விமான நிலையமான கட்டுநாயக்க விமான நிலையம் மீதான தாக்குதலை திட்டமிட்ட மணிமாறன் உட்பட மூன்று விடுதலைப் புலி சந்தேக நபர்களை சிலாபம் காவல்துறையினர் கைது செய்துள்ளனர். இத்தகவலை இன்று புதன்கிழமை வெளிவந்த சிங்கள நாளேடான 'தினமின' செய்தி வெளியிட்டிருக்கின்றது. அச்செய்தியில் மேலும் தெரிவிக்கப்பட்டிருப்பதாவது: "விநாயகம் மணிமாறன் என்பவர் கட்டுநாயக்க விமான நிலைய தாக்குதலின் பின்னர் மன்னாருக்கு தப்பியோடி இந்தியாவில் தஞ்சடைந்திருந்தார். பின்னர் இந்தியாவிலிருந்து லண்டன் சென்ற அவர் கடந்த ஜனவரி மாதம் இலங்கை திரும்பினார். இவர் கொழும்பில் உள்ள விடுதலைப் புலிகளின் உளவுத்துறைப் பொறுப்பாளரைச் சந்தித்த போது அங்கு அவருக்கு மற்றுமொரு தாக்குதல் திட்டமொன்று கையளிக்கப்பட்டது. சிறிலங்கா கடற்படை மீதும் துறைமுகத்தின் மீதும் தாக்குதல் நடத்தவதே அந்த திட்டமாகும். திட்டத்தை அமுல்படுத்த என கொழும்பில் தங்கியிருக்கும் விடுதலைப் புலிகளின் உளவுத்துறையினர் மற்றும் தற்கொலை குண்டுதாரிகள் உட்பட இருபதுக்கும் மேற்பட்டோரின் உதவியைப் பெற அறிவுறுத்தல் விடுக்கப்பட்டது. இந்த இரு தாக்குதல்களையும் ஒரே நாளில் நடத்த வேண்டும் என்று அறிவுறுத்தல் விடுக்கப்பட்டதாக விசாரணைகள் மூலம் தெரிய வந்துள்ளது. இந்த திட்டம் அமுலாகும் வரையில் அவர்கள் சிலாபம் பகுதியில் பாதுகாப்பாக இருக்க திட்டமிட்டிருந்தனர். திட்டத்தை அவர்கள் மேற்கொள்ளும் நடவடிக்கைகளில் ஈடுபட்டுக் கொண்டிருக்கும் போதே உளவுத்துறையினரால் கைது செய்யப்பட்டுள்ளனர். இவருடன் இருந்த ஏனைய விடுதலைப் புலி உறுப்பினர்களான சிவாஜி சிவகரன், செல்வதுரை சேந்தன் என்று அடையாளம் காணப்பட்டுள்ளனர். இவர்கள் அனைவரும் யாழ். மாவட்டத்தைச் சேர்ந்தவர்கள் என்று தெரிவிக்கப்படுகின்றது. தடுப்புக்காவலில் வைக்கப்பட்டுள்ள இவர்கள் மீதான விசாரணைகள் தொடர்கின்றன" என்று அதில் தெரிவிக்கப்பட்டிருக்கின்றது.