நிலவில் தண்ணீர் கண்டுபிடிப்பு: இந்தியா நிகழ்த்திய வரலாற்று சாதனை; இஸ்ரோ தலைவர் பேட்டி
இந்திய விண்வெளி ஆராய்ச்சி மையம் அனுப்பிய சந்திராயான்-1 விண்கலம் நிலவை பல்வேறு கோணங்களில் படம் பிடித்து அனுப்பியது. அதன் மூலம் நிலவில் தண்ணீர் இருப்பது கண்டு பிடிக்கப்பட்டது. இதை அமெரிக்கா நாசா விஞ்ஞானிகள் ஆய்வு செய்து உறுதி செய்தனர். நிலவில் தண்ணீர் இருக்கிறது என்பதை இந்தியா கண்டுபிடித்து உலகுக்கு அறிவித்து இருப்பது பெரிய சாதனையை நிகழ்த்தி உள்ளது.
இதற்காக நாசாவும் இந்திய விஞ்ஞானிகளுக்கு நன்றியும் பாராட்டுகளும் தெரிவித்து உள்ளது.
நிலவில் தண்ணீர் இருப்பது கண்டுபிடிக்கப்பட்டு இருப்பதால் அங்கு உயிரினங்கள் வாழவும் வாய்ப்பு உள்ளது. எனவே இந்தியா இப்போது நிலவில் புதிய ஆய்வுகளுக்கு வழி நடத்தி உள்ளது.
இது தொடர்பாக இன்று இஸ்ரோ தலைவர் மாதவன் நாயர் பெங்களூரில் நிருபர்களுக்கு பேட்டி அளித்தார். அவர் கூறியதாவது:-
நிலவில் பல்வேறு விதமான ஆராய்ச்சிகளை செய்யும் நோக்கத்துக்காக சந்திராயனை அனுப்பினோம். நிலவில் தண்ணீர் இல்லாத வறண்ட பகுதி என்ற கருத்தே நிலவி வருகிறது.
ஆனால் அங்கும் தண்ணீர் இருக்கலாம் என்று கருதினோம். எனவே தண்ணீரை கண்டுபிடிக்கும் நோக்கத்தை முக்கியமாக கொண்டே சந்திராயன் அனுப்பப்பட்டு இருந்தது.
அது வெற்றிகரமாக செயல்பட்டு நமக்கு தேவையான தகவல்களை அனுப்பியது. அதில் நிலவில் தண்ணீர் இருப்பது உறுதி செய்யப்பட்டு உள்ளது. இதன் மூலம் நிலவில் தண்ணீரை கண்டு பிடிக்க வேண்டும் என்ற நமது நோக்கம் நிறைவேறி உள்ளது.
விண்வெளி ஆராய்ச்சியில் பூமிக்கு வெளியே தண்ணீர் இருப்பதை கண்டு பிடித்து இருப்பது இதுவே முதல் முறை.
இதன் மூலம் இந்தியா மிகப்பெரிய வரலாற்று சாதனையை நிகழ்த்தி உள்ளது. உலக அளவில் இந்தியாவுக்கு பெருமை கிடைத்துள்ளது.
நாம் எதிர்பார்த்ததை விட நிலவில் தண்ணீர் அதிகமாக உள்ளது. இது பாறைகளில் உறைந்தபடி இருக்கிறது. அவற்றை எடுத்து தண்ணீராக மாற்றி பயன்படுத்த முடியும்.
நிலவில் தண்ணீர் இருப்பதை கண்டுபிடித்து இருப்பது மட்டும் அல்லாமல் மேலும் ஏராளமான தகவல்களையும் சந்திராயான் அனுப்பி உள்ளது.
இவ்வாறு அவர் கூறினார்.
0 kommentarer:
Post a Comment
உங்களுடைய கருத்தை தெருவிக்கவும்!
நீங்கள் உங்கள் கருத்தை எழுதும் பொழுது தயவுசெய்து முடிந்தவரை தமிழில் எழுதவும்.