மொனறாகலவில் தமிழ் வர்த்தகர் சுட்டுக்கொலை: அச்சத்தில் இந்திய வம்சாவழி தமிழர்கள்

[திங்கட்கிழமை, 27 ஏப்ரல் 2009] சிறிலங்காவின் தென்பகுதியில் உள்ள மொனறாகல மாவட்டத்தில் இராமையா விஷ்வமூர்த்தி என்ற தமிழ் வர்த்தகர் அடையாளம் தெரியாத ஆயுதக்குழு ஒன்றினால் இன்று திங்கட்கிழமை சுட்டுக்கொல்லப்பட்டுள்ளார். இதனையடுத்து மொனறாகல பகுதியில் உள்ள இந்திய வம்சாவழித் தமிழ் மக்கள் மத்தியில் பெரும் அச்ச நிலை உருவாகியுள்ளது. 43 வயதான குறிப்பிட்ட வர்த்தகரான இராமையா உந்துருளி ஒன்றில் வந்த அடையாளம் தெரியாத இருவரால் சுட்டுக்கொல்லப்பட்டதாகத் தெரிவித்த காவல்துறையினர், இது தொடர்பாக மேலதிக தகவல்கள் எதுவும் கிடைக்கவில்லை எனத் தெரிவித்தனர். மொனறாகலவில் வசிக்கும் இந்திய வம்சாவழித் தமிழர்களுக்கு எதிராக அண்மைக்காலத்தில் சிங்களவர்களால் கட்டவிழ்த்துவிடப்பட்டுள்ள வன்முறைகளின் ஒருபகுதியாகவே இந்தப் படுகொலை இடம்பெற்றிருக்கின்றது என மலையக அரசியல் தலைவர் ஒருவர் சுட்டிக்காட்டியிருக்கின்றார். மொனறாகலவில் உள்ள தோட்டம் ஒன்றில் காடையர்கள் கடந்த வாரம் நடந்திய தாக்குதல் ஒன்றையடுத்து அவர்கள் காடுகளுக்குள் அடைக்கலம் புகுந்திருந்தமையையும் இந்திய வம்சாவழி தமிழ் மருத்துவர் ஒருவர் கடந்த வருடம் சுட்டுக்கொல்லப்பட்டதையும் குறிப்பிடும் அவர், மொனறாகல பகுதியில் இருந்து இந்திய வம்சாவழித் தமிழர்களை வெளியேற்றும் திட்டத்துடன் சிங்களக் காடையர்கள் செயற்பட்டுவருவதாகவும் குறிப்பிடுகின்றார்.