"வியட்னாமில் கற்ற பாடத்தை அமெரிக்காவுக்கு புகட்டுவோம்": அமைச்சர் சம்பிக்க ரணவக்க எச்சரிக்கை

[செவ்வாய்க்கிழமை, 28 ஏப்ரல் 2009] "எமது பிரச்சினையில் அத்துமீறித் தலையிட்டு பிரபாகரனைப் பாதுகாப்பதற்கு முற்பட்டால் வியட்நாமில் கற்ற பாடத்தை அமெரிக்காவுக்கு புகட்டுவோம்" என சிறிலங்காவில் உள்ள ஜாதிக ஹெல உறுமய கட்சியின் அரசியல் ஆலோசகரும் சுற்றாடல்துறை அமைச்சருமான சம்பிக்க ரணவக்க கடுமையாக எச்சரித்திருக்கின்றார். கொழும்பு நூலக ஆவண கேட்போர் கூடத்தில் நேற்று திங்கட்கிழமை மாலை நடத்திய ஊடகவியலாளர் மாநாட்டில் உரையாற்றிய போதே அமைச்சர் சம்பிக்க ரணவக்க இவ்வாறு கடுமையான தொனியில் தெரிவித்தார். இங்கு அவர் மேலும் முக்கியமாக குறிப்பிட்டதாவது: "சீனா, ரஷ்யா மற்றும் இந்தியா போன்றன பொருளாதாரத்தில் இன்று வளர்ச்சியடைந்திருப்பதுடன் வல்லரசுகளாகவும் உயர்ந்திருக்கின்றன. இந்நிலையில் பொருளாதாரத்தில் வீழ்ச்சிகண்டுவரும் அமெரிக்காவால் தெற்காசியாவில் வாலாட்ட முடியாது. எமது பிரச்சினையில் அத்துமீறித் தலையிட்டு பிரபாகரனைப் பாதுகாப்பதற்கு அமெரிக்கா முனைந்தால் வியட்னாமில் கற்ற பாடத்தை அமெரிக்காவுக்கு நாம் புகட்டுவோம். அமெரிக்காவின் மிரட்டல்களுக்கு நாம் அஞ்சப்போவதில்லை. விடுதலைப் புலிகள் நடத்தியுள்ள கிளேமோர் தாக்குதல்களுக்கு பிரித்தானியாவே பொறுப்புக்கூற வேண்டும். ஏனெனில் அந்த அரசாங்கம் பாதுகாப்பு வழங்கியிருக்கும் விடுதலைப் புலிகளின் பிரமுகர்களின் தொலைபேசி அழைப்புக்களின் மூலமே இவை நடத்தப்பட்டுள்ளன. இதனைவிட அடேல் பாலசிங்கம் உட்பட விடுதலைப் புலிகளின் முக்கியஸ்தர்கள் பலருடனும் பிரித்தானியாவின் உளவுப் பிரிவுகள் உறவுகளைப் பேணிவருகின்றன." இவ்வாறு சம்பிக்க ரணவக்க தனது உரையில் தெரிவித்தார். இங்கு உரையாற்றிய ஜாதிக ஹெல உறுமயவின் தலைவரும், நாடாளுமன்ற உறுப்பினருமான எல்லாவல மேதானந்த தேரரும் அமெரிக்காவைக் கடுமையாகத் தாக்கினார். அவர் தனது உரையில் முக்கியமாகத் தெரிவித்ததாவது: "டோக்கியோ இணைத் தலைமை நாடுகள் அமெரிக்க இராஜாங்கத் திணைக்களத்தின் ஊடாக விடுதலைப் புலிகளுக்குப் பொது மன்னிப்பு வழங்க வேண்டும் என அச்சுறுத்தல் ரீதியாக அறிக்கை ஒன்றை வெளியிட்டுள்ளன. இது எமது நாட்டின் இறையாண்மையை மீறும் ஒரு நடவடிக்கையாகும். அரச தலைவர் மகிந்த ராஜபக்ச தலைமையிலான அரசாங்கம் விடுதலைப் புலிகளை ஒழிக்கும் நடவடிக்கையைப் பொறுத்தவரையில் இதுவரையில் எந்தவொரு நாட்டுக்கும் அடிபணியவில்லை. நாளை இங்கு மூன்று நாடுகளின் வெளிவிவகார அமைச்சர்கள் வருகைதரவுள்ளனர். இது எமது நாட்டின் இறையாண்மையை மீறும் செயற்பாடாகும். எமது பிரச்சினையை நாம் தீர்த்துக்கொள்வோம். இவர்களுடைய தலையீடு எமக்குத் தேவையில்லை" எனவும் எல்லாவல மேதானந்த தேரர் தெரிவித்தார். இதேவேளையில் பிரித்தானியா மற்றும் பிரான்ஸ் வெளிவிவகார அமைச்சர்கள் நாளை கொழும்பு வருவதற்கு எதிர்ப்புத் தெரிவித்து வீதி மறியல் போராட்டங்களை நடத்துவதற்கும் ஜாதிக ஹெல உறுமய திட்டமிட்டிருப்பதாகத் தெரிவிக்கப்பட்டுள்ளது.