72 மணி நேரங்களில் சிறிலங்காப் படைத்தரப்பில் 17 பேர் பலி- 41 பேர் காயம்

[திங்கட்கிழமை, 17 மார்ச் 2008] வடபோர்முனையிலும், வன்னிக்களமுனையிலும் கடந்த 72 மணிநேரங்களில் இடம்பெற்ற மோதல்களில் 17 படையினர் கொல்லப்பட்டுள்ளனர். 41 பேர் காயமடைந்துள்ளனர் என்று சிறிலங்காப் படைத்தரப்புச் செய்திகள் தெரிவித்துள்ளன. வடபோர்முனையில்... யாழ். முகமாலையில் நேற்று முன்நாள் சனிக்கிழமை முற்பகல் 10:25 மணியளவில் இடம்பெற்ற மோதலில் படைத்தரப்பைச் சேர்ந்த 3 பேர் கொல்லப்பட்டுள்ளனர். 3 பேர் படுகாயமடைந்துள்ளனர். வன்னிக்களமுனையில்... மன்னார் மன்னார் மாளிகைத்திடல் பகுதியில் நேற்று முன்நாள் இடம்பெற்ற மோதலில் 2 படையினர் காயமடைந்துள்ளனர். இதேபகுதியில் நேற்று இடம்பெற்ற தாக்குதலில் படைத்தரப்பைச் சேர்ந்த ஒருவர் கொல்லப்பட்டுள்ளார். அத்துடன் இதேபகுதியில் நேற்றைய நாள் இடம்பெற்ற மோதல்களில் 4 படையினர் காயமடைந்துள்ளனர். அதேநேரம், மன்னார் நகரில் நேற்று காலை 7:00 மணியளவில் நடத்தப்பட்ட தாக்குதலில் காவல்துறை அதிகாரி கொல்லப்பட்டுள்ளார். ஒருவர் காயமடைந்துள்ளார். அடம்பன் பாலைக்குழிப் பகுதியில் நேற்று முன்நாள் முற்பகல் 9:20 மணியளவில் இடம்பெற்ற மோதலில் படைத்தரப்பைச் சேர்ந்த 2 பேர் காயமடைந்துள்ளனர். இதேபகுதியில் நேற்று இடம்பெற்ற தாக்குதலில் 2 படையினர் காயமடைந்துள்ளனர். இதேவேளை, மன்னார் முள்ளிக்குளம் பகுதியில் நேற்று பிற்பகல் 4:45 மணியளவில் இடம்பெற்ற மோதலில் படைத்தரப்பைச் சேர்ந்த ஒருவர் காயமடைந்துள்ளார். சின்னப்பண்டிவிரிச்சான் பகுதியில் நேற்று விடுதலைப் புலிகளின் பொறிவெடிகளில் சிக்கி படைத்தரப்பைச் சேர்ந்த ஒருவர் காயமடைந்தார். மணலாற்றில்... மணலாற்றில் கம்பிலிவேவப் பகுதியில் நேற்று பிற்பகல் 3:35 மணியளவில் இடம்பெற்ற மோதலில் படைத்தரப்பைச் சேர்ந்த ஒருவர் காயமடைந்துள்ளார். கொக்குத்தொடுவாய்ப் பகுதியில் நேற்று முற்பகல் 9:00 மணியளவிலும் பிற்பகல் 1:00 மணியளவிலும் இடம்பெற்ற மோதல்களில் 4 படையினர் கொல்லப்பட்டுள்ளனர். 3 பேர் காயமடைந்துள்ளனர். ஆண்டான்குளம் பகுதியில் நேற்று பிற்பகல் 12:30 மணியளவில் இடம்பெற்ற தாக்குதலில் படைத்தரப்பைச் சேர்ந்த ஒருவர் காயமடைந்துள்ளார். ஜனகபுரப் பகுதியில் நேற்று முன்நாள் இடம்பெற்ற மோதலில் படைத்தரப்பைச் சேர்ந்த 3 பேர் கொல்லப்பட்டுள்ளனர். 7 பேர் காயமடைந்தனர். கிரிபன்வேவப் பகுதியில் நேற்று முன்நாள் முற்பகல் 10:15 மணியளவில் இடம்பெற்ற மோதலில் படைத்தரப்பைச் சேர்ந்த ஒருவர் காயமடைந்துள்ளார். இதேவேளை, ஆண்டான்குளம் மற்றும் கிரிபன்வேவப் பகுதிகளில் நேற்று இடம்பெற்ற மோதல்களில் 2 படையினர் கொல்லப்பட்டுள்ளனர். 5 பேர் காயமடைந்துள்ளனர். வவுனியாவில்... வவுனியாவில் இராமன்புலம் பகுதியில் நேற்று முற்பகல் 9:40 மணியளவில் இடம்பெற்ற மோதலில் படைத்தரப்பைச் சேர்ந்த ஒருவர் காயமடைந்துள்ளார். அதேநேரம் மரக்காரம்பளைப் பகுதியில் நேற்று இடம்பெற்ற கிளைமோர்த் தாக்குதலில் படைத்தரப்பைச் சேர்ந்த அதிகாரி ஒருவர் கொல்லப்பட்டுள்ளார். 3 பேர் படுகாயமடைந்துள்ளனர். இதேவேளை பறையனாலங்குளப் பகுதியில் நேற்று இடம்பெற்ற தாக்குதலில் படைத்தரப்பைச் சேர்ந்த ஒருவர் கொல்லப்பட்டுள்ளார். அம்பாறையில்... அம்பாறையில் றொட்டைப் பகுதியில் நேற்று முன்நாள் இடம்பெற்ற தாக்குதலில் சிறப்பு அதிரடிப்படையைச் சேர்ந்த ஒருவர் கொல்லப்பட்டுள்ளார். 3 பேர் காயமடைந்துள்ளனர்.