மன்னாரில் சிறிலங்கா இராணுவத்தினரின் முன்நகர்வு முறியடிப்பு: 12 இராணுவத்தினர் பலி. 50 படையினர் படுகாயம்

[புதன்கிழமை, 25 ஏப்ரல் 2007] மன்னாரில் சிறிலங்கா இராணுவத்தினர் மேற்கொண்ட பாரிய முன்நகர்வை தமிழீழ விடுதலைப் புலிகள் இன்று முறியடித்தனர். இதில் சிறிலங்கா இராணுவத்தினருக்குப் பாரிய இழப்புக்கள் ஏற்படுத்தப்பட்டுள்ளன. மன்னாரில் இரணை இலுப்பைக்குளத்திலிருந்து வலயன்கட்டு நோக்கி சிறிலங்கா இராணுவத்தினர் மேற்கொண்ட பாரிய நகர்வு நடவடிக்கை விடுதலைப் புலிகளால் முறியடிக்கப்பட்டுள்ளது. இதில் சிறிலங்கா இராணுவத் தரப்பினருக்கு பாரிய இழப்புக்கள் ஏற்படுபடுத்தப்பட்டுள்ளன. மன்னார் இரணை இலுப்பைக்குளத்திலிருந்து இன்று புதன்கிழமை காலை 9 மணிக்கு சிறிலங்கா இராணுவத்தினர் பெருமெடுப்பில் கனரக கவச வாகனங்கள் சகிதம் வலயன்கட்டு, முள்ளிக்குளம் பகுதிகளை நோக்கிய முன்னகர்வு நடவடிக்கையை மேற்கொண்டனர். இராணுவத்தினருக்கு ஆதரவாக மிகச்செறிவான எறிகணைச் சூட்டாதரவும் மேற்கொள்ளப்பட்டது. இன்று புதன்கிழமை காலை 9 மணிக்கு மேற்கொண்ட நகர்வு நடவடிக்கைக்கு எதிராக விடுதலைப் புலிகள் பரிசங்குளத்தில் முறியடிப்புத்தாக்குதலை நடத்தினர். இராணுவத்தினருக்கு எதிராக பரிசங்குளத்தில் வைத்து விடுதலைப் புலிகள் நடத்திய முறியடிப்புத் தாக்குதலில் இராணுவத்தினருக்கு கடும் இழப்புக்கள் ஏற்பட்டுள்ளன. இராணுவத்தினரின் நகர்வு நடவடிக்கை பிற்பகல் 2 மணிக்கு விடுதலைப் புலிகளால் முறியடிக்கப்பட்ட நிலையில் ஆயுதங்கள் மற்றும் வெடிபொருட்களை கைவிட்டு இரணை இலுப்பைக்குளத்திற்கு சிறிலங்கா இராணுவம் பின்வாங்கியது. இராணுவத்தினர் கைவிட்டுச் சென்ற ஆயுதங்கள் மற்றும் வெடிபொருட்கள் விடுதலைப் புலிகளால் கைப்பற்றப்பட்டுள்ளன. முறியடிக்கப்பட்ட இத்தாக்குதலில் விடுதலைப் புலிகளுக்கு இழப்புக்கள் எதுவும் ஏற்படவில்லை. இரணை இலுப்பைக்குளத்திலிருந்து அநுராதபுரம் மருத்துவமனைக்கு இன்று மாலை வரை இராணுவத்தினரின் சடலங்களும் காயமடைந்த இராணுவத்தினரும் உலங்கு வானூர்திகள் மூலம் கொண்டு செல்லப்பட்டனர். அநுராதபுரம் மருத்துவமனையில் இன்று மாலை ஊடகவியலாளர்கள் எவரும் உள்நுழைய இராணுவத்தினரால் அனுமதிக்கப்படவில்லை. அநுராதபுரம் மருத்துவமனையில் கொல்லப்பட்ட இராணுவத்தினர் 12 பேரின் சடலங்கள் உள்ளதாகவும், 40-க்கும் அதிகமான இராணுவத்தினர் காயமடைந்த நிலையில் மருத்துவமனைக்கு கொண்டு செல்லப்பட்டதாகவும் கொழும்பில் படைத்தரப்பு வட்டாரங்கள் தெரிவித்தன. இராணுவத்தினருக்கு ஏற்பட்ட இழப்புக்கள் பாரியதானது என்றும் கொழும்புச் செய்திகள் தெரிவிக்கின்றன.