'சிறிலங்காவிற்கு அமெரிக்கா அமைதிப்படையை அனுப்பாது': அமெரிக்கா.

[புதன்கிழமை, 7 மார்ச் 2007] [புதினம்.கொம். ] "சிறிலங்காவின் பாதுகாப்புச் செயலாளர் கோத்தபாய ராஜபக்சவிற்கும் அமெரிக்காவின் சிறிலங்காவிற்கான தூதுவர் றொபேர்ட் ஒ பிளேக்கிற்கும் இடையில் கடந்த திங்கட்கிழமை செய்துகொள்ளப்பட்ட ஒப்பந்தமானது சாதாரண பொருட்கள் மற்றும் சேவைகளின் வழங்கல்களுக்கான ஒரு உடன்பாடு" என அமெரிக்க தூதரக வட்டாரங்கள் தெரிவித்திருக்கின்றன. இது தொடர்பில் அமெரிக்க தூதரக ஊடகத்துறை அதிகாரி ஈவான்ஸ் ஓவன் நேற்று செவ்வாய்க்கிழமை தெரிவித்ததாவது: "அமெரிக்காவின் அமைதி காக்கும் படையினர் சிறிலங்காவில் பணியாற்றுவதோ அல்லது சிறிலங்காவின் படையினரை வேறு இடங்களுக்கு கொண்டு செல்வதோ இந்த ஒப்பந்தத்தில் இல்லை. இந்த ஒப்பந்தம் இரு நாடுகளுக்கு இடையில் வழங்கல்களை பரிமாறிக் கொள்வதும், ஆதரவுகளை வழங்குவதுமாகும். சிறிலங்காவிற்கு செல்லும் அமெரிக்க கப்பல்களின் எண்ணிக்கை தொடர்பாகவும் இதில் குறிப்பிடப்படவில்லை. எனினும் பொருட்களையும், சேவைகளையும் இலகுவாக பெற்றுக்கொள்ள இந்த ஒப்பந்தம் வழிவகுக்கும்." இந்த ஒப்பந்தத்தின் பிரகாரம் சிறிலங்காவில் ஒரு முழு அளவிலான போர் மூண்டால் அமெரிக்கா இராணுவ உதவிகளை வழங்குமா எனக் கேட்டபோது, அதற்கு அவர் பதிலளிக்க மறுத்ததுடன் "இதனை உறுதிப்படுத்த தன்னிடம் போதிய தகவல்கள் இல்லை" எனவும் தெரிவித்தார். மேலும் "உணவுப் பொருட்கள், எரிபொருள், போக்குவரத்து என்பனவே இந்த ஒப்பந்தத்தின் மூலம் அனுமதிக்கப்படும் பொருட்களும் சேவைகளும் ஆகும். ஆயுதங்கள் மற்றும் வெடிபொருட்கள் வழங்குவதை இந்த ஒப்பந்தம் தெளிவாக தடைசெய்துள்ளதாக" அமெரிக்க தூதரக செய்திக் குறிப்பு தெரிவிக்கின்றது.