வவுனியாவிற்கு மட்டுப்படுத்தப்பட்ட தொடருந்து சேவைகள்

[திங்கட்கிழமை, 04 பெப்ரவரி 2008] சிறிலங்கா தலைநகர் கொழும்பில் நேற்று ஞாயிற்றுக்கிழமை இடம்பெற்ற குண்டுவெடிப்புச் சம்பவங்களைத் தொடர்ந்து வவுனியாவிற்கான தொடருந்து சேவைகள் மட்டுப்படுத்தப்பட்டுள்ளன. பாதுகாப்பு அமைச்சின் அறிவுறுத்தல்களின் பிரகாரம் இந்நடைமுறைகள் கொண்டுவரப்பட்டதாக காவல்துறை வட்டாரங்கள் தெரிவித்துள்ளன. இது தொடர்பில் மேலும் தெரியவருவதாவது: கொழும்பிற்கும் வவுனியாவிற்கும் இடையிலான தொடருந்து சேவைகள் (யாழ்தேவி) மறு அறிவித்தல் வரையிலும் மதவாச்சியுடன் மட்டுப்படுத்தப்பட்டுள்ளன. வவுனியா மற்றும் மன்னார் பகுதிகளில் இருந்து அனுராதபுரம் நோக்கி வரும் பேருந்துகளும் மதவாச்சி வரையிலும் அனுமதிக்கப்படும். மதவாச்சியில் இருந்து அனுராதபுரத்திற்கு வேறு பேருந்துகள் சேவையில் ஈடுபடுத்தப்படும். சிறிலங்காவின் சுதந்திர நாள் விழாவையும், வடபகுதியில் நடைபெற்று வரும் படை நடவடிக்கைகளையும் தொடர்ந்து இந்நடைமுறைகள் கொண்டு வரப்பட்டுள்ளதாக தெரிவிக்கப்படுகின்றது.