சிறிலங்காவில் நடைபெற்ற ஊழல்களில் முப்படைத் தளபதிகளுக்கும் பங்குண்டு: விசாரணைக் குழு

[ஞாயிற்றுக்கிழமை, 10 பெப்ரவரி 2008] சிறிலங்காவில் 2000 ஆம் ஆண்டில் இருந்து 2005 ஆம் ஆண்டு வரையிலும் நடைபெற்ற ஆயுதக்கொள்வனவுகளில் நடைபெற்ற ஊழல்களில் முப்படையினரின் தளபதிகளும், மேலும் பல மூத்த அதிகாரிகளும் சம்பந்தப்பட்டுள்ளதாக அரசாங்கத்தினால் அமைக்கப்பட்டுள்ள விசாரணைக் குழு தெரிவித்துள்ளது. இது தொடர்பில் விசாரணை ஆணைக்குழு மேலும் தெரிவித்துள்ளதாவது: இக்காலப்பகுதியில் மேற்கொள்ளப்பட்ட ஆயுதக்கொள்வனவுகளுக்கு கேள்விப் பத்திரங்கள் கோரப்படவில்லை. பெரும்பாலான நேரங்களில் தேசியப் பாதுகாப்பு என்ற போர்வையில் கொள்வனவுகள் மேற்கொள்ளப்பட்டுள்ளன. இந்த ஊழல் விவகாரங்களில் முன்னாள் இராணுவத்தளபதி லெப். ஜெனரல் லயனல் பலேகல்ல, முன்னாள் கடற்படைத் தளபதியும் படைத்துறை முத்த அதிகாரியுமான அட்மிரல் தயா சந்திரகிரி, முன்னாள் வான்படைத் தளபதி ஏயர் வைஸ் மார்சல் ஜெயலத் வீரக்கொடி உள்ளிட்ட பல உயர் அதிகாரிகள் ஈடுபட்டுள்ளது தெரியவந்துள்ளது. கொழும்பு டொக்கியாட் நிறுவனத்திடம் 27 மீற்றர் நீளமான 10 டோராப் படகுகளை கொள்வனவு செய்வதற்கு கடற்படையினர் நிதியை செலுத்தியிருந்தனர். ஆனால் 3 மீற்றர் நீளம் குறைவான படகுகளே அவர்களுக்கு விநியோகம் செய்யப்பட்டுள்ளன. அதன் தரமும் குறைவானது. மற்றுமொரு சம்பவத்தில் பிரித்தானியா நிறுவனம் ஒன்றிடம் இருந்து ஒலிகன் வகை 30 மி.மீ பீரங்கிகளை கொள்வனவு செய்வதற்கு கடற்படையினர் திட்டமிட்டிருந்தனர். எனினும் பின்னர் கடற்படைத் தளபதியாக நியமிக்கப்பட்ட வைஸ் அட்மிரல் வசந்த கரணகொட அதனை நிறுத்தியிருந்தார். பின்னர் ஒலிகன் பீரங்கிகளை விட தரமான புஷ் மாஸ்ரர் வகை 30 மி.மீ பீரங்கிகளை கடற்படையினர் அதனை விட நான்கு மடங்கு குறைந்த விலையில் கொள்வனவு செய்துள்ளனர் என்று அதில் தெரிவிக்கப்பட்டுள்ளது. புதினம்.கொம்