மன்னாரில் படையினரின் முன்நகர்வுகள் முறியடிப்பு: 11 படையினர் பலி- 23 பேர் காயம்

[ஞாயிற்றுக்கிழமை, 17 பெப்ரவரி 2008] மன்னார் மாவட்டத்தில் உள்ள பண்டிவிரிச்சானிலும் பாலமோட்டையிலும் சிறிலங்காப் படையினர் மேற்கொண்ட முன்நகர்வுகள் தமிழீழ விடுதலைப் புலிகளால் முறியடிக்கப்பட்டுள்ளன. இதில் 11 படையினர் கொல்லப்பட்டுள்ளனர். 23 பேர் காயமடைந்துள்ளனர். பண்டிவிரிச்சான் பகுதியில் விடுதலைப் புலிகளின் நிலைகளை நோக்கி நேற்று சனிக்கிழமை முற்பகல் 10:00 மணிக்கு படையினர் முன்நகர்ந்த போது விடுதலைப் புலிகள் முறியடிப்புத் தாக்குதலை நடத்தினர். படையினரின் இம் முன்நகர்வு பிற்பகல் 3:20 மணிக்கு விடுதலைப் புலிகளால் முறியடிக்கப்பட்டது. படையினர் அவர்களின் நிலைகளுக்கு விரட்டியடிக்கபட்டனர். செறிவான எறிகணைச் சூட்டாதரவினை நடத்தி படையினரின் இம் முன்நகர்வு முறியடிக்கப்பட்டது. இதில் 4 படையினர் கொல்லப்பட்டனர். 9 பேர் காயமடைந்தனர். இரு வெவ்வேறு நேரங்களில் படையினர் இம் முன்நகர்வு முயற்சிகளை மேற்கொண்டிருந்தனர். பாலக்குழியில் நேற்று காலை படையினர் மேற்கொண்ட முன்னகர்வும் விடுதலைப் புலிகளால் முறியடிக்கப்பட்டது. அதேநேரம் பாலமோட்டைப் பகுதி ஊடாக நேற்று படையினர் நடத்திய தாக்குதல் விடுதலைப் புலிகளால் முறியடிக்கப்பட்டது. இதில் 7 படையினர் கொல்லப்பட்டனர். 14 பேர் காயமடைந்தனர். அப் பகுதியிலும் நேற்று பிற்பகல் 12:45 மணிக்கு படையினர் செறிவான எறிகணைச் சூட்டாதரவுடன் விடுதலைப் புலிகளின் நிலைகளை நோக்கி முன்நகர்வினை மேற்கொண்டனர். பிற்பகல் 2:30 மணிவரை நடைபெற்ற விடுதலைப் புலிகளின் தீவிர தாக்குதலை அடுத்து படையினர் இழப்புக்களுடன் பின்வாங்கினர்.