பழ.நெடுமாறன் உட்பட தமிழீழ ஆதரவாளர்கள் அனைவரும் காவல்துறையினரால் கைது.!

[புதன்கிழமை, 12 செப்ரெம்பர் 2007] (செய்தி இணைப்பு 2) நெடுமாறன் அவர்களின் சாகும் வரையிலான உண்ணாநிலைப் போராட்ட அறிவிப்பை அடுத்து நெடுமாறன் உட்பட பேரணியில் கலந்துகொண்ட தமிழீழ உணர்வாளர்கள் அனைவரும் தமிழகக் காவல்துறையினரால் கைது செய்யப்பட்டு மண்டபத்திற்கு அழைத்துச் செல்லப்பட்டுள்ளனர். நாகைபட்டினத்திலும் இராமேஸ்வரம் ஆகிய பகுதிகளில் படகேறும் போராட்டத்தில் கலந்து கொண்ட தமிழீழ உணர்வாளர்கள் அனைவரும் தமிழக காவல்துறையினரால் வாகனங்களில் ஏற்றப்பட்டு மண்டபத்திற்கு அழைத்துச் செல்லப்பட்டுள்ளனர். மண்டபத்திற்கு கைது செய்யப்பட்டு கொண்டு செல்லப்பட்ட தமிழீழ ஆதரவாளர்கள் மீது தமிழக அரசு எத்தகைய வழக்குகளைப் பதிவு செய்யப் போகின்றது என எல்லோரும் எதிர்பார்த்து காத்திருக்கின்றனர். தமிழீழ உணர்வாளர்கள் அனைவரும் தனித் தனியாக காவல்துறையினரால் விசாரிக்கப்பட்டு அவர்களின் சுய விபரங்கள் திரட்டப்படுகின்றன. காவல்துறையினர் என்னைக் கைது செய்தாலும் நான் சிறையில் எனது உண்ணா நிலைப் போராட்டத்தை தொடர்வேன் என பழ.நெடுமாறன் அவர்கள் அறிவித்துள்ளார். அத்துடன் தமிழீழ உணர்வாளர்கள் படகேறும் பயணப் போராட்டம் தொடரும் என பழ.நெடுமாறன் அவர்கள் கைது செய்யப்பட்ட வேளையில் தமிழக காவல்துறையினரிடம் தெரிவித்துள்ளார். படகேறும் போராட்டத்தில் கலந்துகொண்ட உணர்வாளர்கள் கைதின் போது காவல்துறையினருடன் வாய்த் தர்க்கத்தில் ஈடுபட்டு காவல்துறையின தள்ளுப்பட்டு மோதுண்டுள்ளனர். போராட்டத்தில் கலந்துகொண்டோரை சென்னையில் உள்ள ஆளும் நிர்வாகம் கைது செய்யப்பட்டு வழக்குத் தாக்கல் செய்யக் கூறியதாக செய்திகள் வெளியாகியுள்ளன. போராட்டத்தில் கலந்துகொண்டோர் மீது கைது செய்யப்பட்டவர்கள் மீது எவ்வகையான வழக்கைப் பதிவு செய்வது குறித்து சென்னை நிர்வாகம் முடிவு செய்யப்படும் எனத் தெரிவிக்கப்பட்டுள்ளது. இன்றைய கைதில் வயோதிபர்கள், அன்னையர்கள், இளைஞர்கள் யுவதிகள் என வயது வேறுபாடின்றி அனைவரும் கைது செய்யப்பட்டுள்ளனர். கைது செய்யப்படாது வெளியில் இருக்கும் தமது தமிழீழ ஆதரவாளர்கள் யாழ் குடாநாட்டுக்கான உணவுப் பொருட்கள் மருந்துப் பொருட்களை எடுத்து செல்லும் போராட்டதை முன்னெடுப்பர் என தெரிவிக்கப்படுகிறது. நன்றி:பதிவு