பணியாளர்களின் பாதுகாப்பு ஆராய ஐ.நா. உயர்நிலைக் குழு வருகை

[சனிக்கிழமை, 12 ஏப்ரல் 2008] இலங்கையில் பணியாற்றும் தமது பணியாளர்களின் பாதுகாப்பு நிலைமைகள் தொடர்பில் ஆராய ஐக்கிய நாடுகள் சபையின் உயர்நிலைக்குழு இந்த வாரம் இலங்கை வருகிறது. அனைத்துலக அளவிலான ஐ.நா. பணியாளர்களின் பாதுகாப்பு தொடர்பிலான இக்குழுவினர், இலங்கையில் ஐ.நா. பணியாளர்களின் பாதுகாப்பு மற்றும் அது தொடர்பிலான சவால்கள் ஆகியவை குறித்து ஆராய உள்ளது. கடந்த டிசம்பரில் அல்ஜியர்சில் ஐ.நா. பணியாளர்கள் 17 பேர் குண்டுவெடிப்புக்களில் கொல்லப்பட்ட நிலையில் இக்குழு அமைக்கப்பட்டது. கிளிநொச்சிப் பகுதியில் சிறிலங்கா வான்படையின் குண்டுத்தாக்குதலில் ஐ.நா. அலுவலகம் கடந்த ஆண்டு சேதமடைந்திருந்தது. மேலும் உலகிலேயே மனிதாபிமான பணியாளர்கள் பணியாற்றுவதற்கு மிகவும் ஆபத்தான இடமாக இலங்கையை ஐ.நா.வின் மனிதாபிமான விவகாரங்களுக்கான செயலாளர் ஜோன் ஹோல்சும் குறிப்பிட்டிருந்தமையும் குறிப்பிடத்தக்கது.