மன்னாரில் படையினரின் மும்முனை முன்நகர்வுகள் முறியடிப்பு

[செவ்வாய்க்கிழமை, 12 பெப்ரவரி 2008] மன்னார் பண்டிவிரிச்சான் பகுதியில் மும்முனைகளில் சிறிலங்காப் படையினர் மேற்கொண்ட முன்நகர்வுகள் தமிழீழ விடுதலைப் புலிகளால் முறியடிக்கப்பட்டுள்ளன. பண்டிவிரிச்சான் முதன்மை வீதியூடாகவும் அதன் இரு பக்கங்கள் ஊடாகவும் செறிவான மோர்ட்டார் எறிகணைச் சூட்டாதரவுடன் நேற்று திங்கட்கிழமை பிற்பகல் 1:30 மணியளவில் முன்நகர முயற்சித்த படையினர் மீது, விடுதலைப் புலிகள் 2 மணிநேரம் எதிர்த்தாக்குதல் நடத்தி முறியடித்தனர். இத்தாக்குதலில் விடுதலைப் புலிகளின் பொறிவெடியில் படையினர் சிக்கி பலத்த இழப்புக்களைச் சந்தித்துள்ளனர். மேலும் மன்னார் கட்டையடம்பன் பகுதியில் படையினரின் ஆழ ஊடுருவும் அணியின் தாக்குதல் முயற்சி விடுதலைப் புலிகளால் முறியடிக்கப்பட்டு வெடிபொருட்கள் கைப்பற்றப்பட்டுள்ளன. இத்தாக்குதலின் போது கிளைமோர் - 04, அதற்கான வெடிப்பிகள், வெடிபொருட்கள் என்பன விடுதலைப் புலிகளால் கைப்பற்றப்பட்டுள்ளன. இதனிடையே மன்னார் மாவட்டத்தில் படையினரின் எறிகணைத் தாக்குதலில் நாள்தோறும் 50-க்கும் அதிகமான கால்நடைகள் உயிரிழக்கின்றன. கால்நடைகள் செறிந்த வாழும் அடம்பனில் 20,000-க்கும் அதிகமான கால்நடைகள் இருக்கின்றன. படையினரின் போர் நடவடிக்கை காரணமாக மக்கள் வாழ்விடங்களை வெளியேறியதனை அடுத்து மக்களின் கால்நடைகள் உணவுக்காக அலைந்து திரிகின்றன. இவ்வாறு அலைந்து திரியும் கால்நடைகள் படையினரின் எறிகணைத் தாக்குதலுக்கு இலக்காகி நாள்தோறும் 50-க்கும் அதிகமான உயிரிழக்கின்றன.