கொழும்பு புறநகரில் குண்டுவெடிப்பு- 18 பேராக அதிகரிப்பு- 40 பேர் காயம்- 5 பேர் கவலைக்கிடம்.!!

[புதன்கிழமை, 28 நவம்பர் 2007]

சிறிலங்காவின் தலைநகர் கொழும்பு புறநகர்ப் பகுதியில் இன்று மாலை குண்டு வெடித்ததில் 18 பேர் கொல்லப்பட்டுள்ளனர். 40 பேர் படுகாயமடைந்துள்ளனர். படுகாயமடைந்தோரில் 5 பேர் கவலைக்கிடமாக உள்ளனர்.

கொழும்பு புறநகரான நுகெகொடவில் உள்ள பிரபல ஆடையகமான நோலிமிட்டின் பொதிகள் காப்பகத்தில் இன்று புதன்கிழமை மாலை 5:45 மணிக்கு ஆண் ஒருவர் ஒரு பொதியை கொடுத்துவிட்டு கடையின் உள்ளே சென்றுள்ளார்.

மீண்டும் சில நிமிடங்கள் கழித்து கடைக்கு வெளியே வந்த அந்நபர் பொதிகள் காப்பகத்தில் கொடுத்த தனது பொதியை வாங்காது சென்றுள்ளார்.

அங்கு நின்ற பொதிகள் காப்பகத்தைச் சேர்ந்தவர்கள் அப்பொதியை வாங்கிச் செல்லுமாறு கோரிய போதும் அவர் அதனை வாங்காது சென்றுவிட்டார்.

இது குறித்து அப்பகுதியில் இருந்த சிறிலங்கா காவல்துறைக்குத் தகவல் கொடுக்கப்பட்டது.

அதனையடுத்து அங்கு வந்த காவல்துறையைச் சேர்ந்த ஒருவர், அப்பொதியை பிரிக்க முயற்சித்தார். அப்போது அப்பொதியில் இருந்த குண்டு சிதறியுள்ளது.

இதில் 18 பேர் பேர் கொல்லப்பட்டுள்ளனர். 40 பேர் காயமடைந்த நிலையில் களுபோவில மருத்துவமனைக்கு கொண்டு செல்லப்பட்டனர்.

அப்பகுதியில் பாரிய புகை மற்றும் தீயுடன் குண்டுவெடித்ததாகவும் கட்டடம் நாசமடைந்ததாகவும் நேரில் பார்த்தவர்கள் தெரிவித்துள்ளனர்.

இக்குண்டு வெடிப்பில் அங்கிருந்த பல கடைகள் தீப்பற்றி எரிந்தன. சில கட்டங்கள் கடுமையாகச் சேதமடைந்துள்ளன. கடைகளுக்கு முன்பாக நிறுத்தி வைக்கப்பட்டிருந்த உந்துருளிகளும் வீதியால் சென்ற வாகனங்கள் சிலவும் இத்தாக்குதலை அடுத்து தீப்பற்றிக்கொண்டன.

கோட்டை மற்றும் மாநகர சபைக்குரிய தீயணைப்பு படையினர் சம்பவ இடத்திற்கு விரைந்தனர். எனினும் சுமார் அரை மணிநேரத்திற்குப் பின்னரே அவர்களால் தீயைக் கட்டுப்பாட்டுக்ககுள் கொண்டுவர முடிந்தது.

இத்தாக்குதலில் காயமடைந்தவர்களில் பலர் அப்பகுதியில் உள்ள பேரூந்து நிலையத்தில் காத்துநின்ற பொதுமக்கள் என்று நுகேகொட சிறிலங்கா காவல்துறையினர் தெரிவித்தனர்.

காயமடைந்தவர்கள் களுபோவில மருத்துவமனைக்கு எடுத்துச்செல்லப்பட்டனர். அங்கு மேலதிக மருத்துவர்களும் அனுப்பட்டடிருப்பதாக கொழும்பு தேசிய மருத்துவமனை மருத்துவர் ஒருவர் தெரிவித்தார்.

களுபோவில மருத்துவமனையில் அனுமதிக்கப்பட்டவர்களில் இதுவரை ஐந்து பேரை கொழும்பு தேசிய மருத்துவமனைக்கு மாற்றியிருப்பதாக அம் மருத்துவமனை அதிகாரிகள் தெரிவித்தனர்.

அவர்களில் 5 பேரின் நிலைமை மிக மோசமாக இருப்பதாக செய்திகள் தெரிவிக்கின்றன.

இதனிடையே களுபோவில மருத்துவமனையில் அனுமதிக்கப்பட்டுள்ளவர்களில் அரைவாசிப் பேருக்கும் மேலானோர் கடும் காயங்களுக்கு உள்ளாகியுள்ளனர்.

இச்சம்பவத்தை அடுத்து நுகேகொடவிற்கான போக்குவரத்துகள் தடைப்பட்டுள்ளன. நுகேகொட ஊடாக பயணிக்கும் மக்களை வேறு பகுதிகளின் ஊடாக பயணிக்குமாறு சிறிலங்கா காவல்துறையினர் அறிவுறுத்தியுள்ளனர்.

சம்பவ இடத்தில் அதிரடிப்படையினரும், இராணுவத்தினரும், காவல்துறையினரும் பெருமளவில் குவிக்கப்ட்டுளளனர். வீதிகளில் கடும் சோதனைகள் நடைபெற்று வருகின்றன. தாக்குதல் நடைபெற்ற பகுதியில் பெரும் பரபரப்பு நிலவுகிறது.

சிறிலங்காவில் அரச தலைவர் இல்லாததால் இச்சம்பவத்தை அடுத்து எடுக்கவுள்ள பாதுகாப்பு நடைமுறைகள் குறித்து பாதுகாப்பு அமைச்சின் செயலாளர் தலைமையில் அமைச்சர்கள் மட்ட மாநாடு ஒன்று நடைபெறுவதாகத் தெரியவருகிறது.

நுகேகொட கொழும்பு நகரிலிருந்து தென்கிழக்கில் 8 கிலோ மீற்றர் தொலைவில் அமைந்துள்ள மிரிகன காவல்துறை பிரதேசத்திற்கு உட்பட்ட பகுதியாகும்.

இதனிடையே மஹரகம நாவின்ன பகுதியில் சந்தேகத்திற்கிடமான பார்சல் குண்டு காணப்படுவதாகவும் அதனை செயலிக்க வைக்கும் பிரிவினர் சென்றிருப்பதாகவும் பாதுகாப்பு அதிகாரிகள் தெரிவித்துள்ளனர்.

மேல்மாகாணத்தில் நாளை முதல் பாதுகாப்புக் காரணங்களுக்காக பாடசாலைகளை இரண்டு நாட்களுக்கு மூடுமாறு சிறிலங்கா அரசாங்கம் தற்போது அறிவித்திருக்கிறது.