காணாமல்போனோர் விவகாரம் உட்பட யுத்தத்தின் போது பாதிக்கப்பட்ட மக்களின் பிரச்சினைகள் தொடர்பில் ஆழமாகக் கவனம் செலுத்தி அவற்றுக்கு தீர்வைப் பெற்றுக்கொடுக்க எனது முழு அதிகாரத்தையும் பயன்படுத்துவேன். பாதிக்கப்பட்ட உங்களது ஆதங்கங்கள் எனக்கு புரிகின்றது என்று ஐ.நா. மனித உரிமை ஆணையாளர் நவநீதம்பிள்ளை தெரிவித்துள்ளார்.
முள்ளிவாய்க்கால், புதுமாத்தளன் மற்றும் கேப்பாப்பிலவு பகுதிகளுக்கு நேற்று விஜயம் செய்த நவநீதம்பிள்ளை அந்தப் பகுதி மக்களின் குறைபாடுகளை கேட்டறிந்துகொண்டார்.
மக்கள் அழுது புலம்பி, காணாமல் போன உறவுகளை மீட்டுத்தருமாறும் யுத்தத்தால் பாதிக்கப்பட்ட தமக்கு அடிப்படை வசதிகளை செய்து தருமாறும் கோரிக்கை விடுத்தனர்.
இதன் போது அந்த மக்கள் மத்தியில் கருத்துத் தெரிவிக்கையிலேயே நவநீதம்பிள்ளை மேற்கண்டவாறு தெரிவித்தார்.
முள்ளிவாய்க்கால் பகுதியில் கருத்துத் தெரிவித்த அவர், நான் தூர தேசத்திலிருந்து உங்களின் பிரச்சினைகள் குறித்து ஆராய்வதற்காகவே வந்துள்ளேன்.
காணாமல் போனோர் விவகாரம் தொடர்பில் நான் நன்கு அறிந்துள்ளேன். இதேபோல் உங்களது ஏனைய பிரச்சினைகள் தொடர்பிலும், ஆழமாக கவனம் செலுத்தி தீர்வைப் பெற்றுக்கொடுக்க வேண்டிய பொறுப்பு எனக்குள்ளது.
இதனால் எனக்குள்ள அதிகாரங்கள் அனைத்தையும் பயன்படுத்தி பிரச்சினைகளுக்கு தீர்வைக்காண முயற்சிப்பேன்.
ஐ.நா. நிறுவனங்கள் உதவிகள் வழங்கும் போது வடக்கு, கிழக்கில் யுத்தத்தால் பாதிக்கப்பட்ட மக்களுக்கு கூடுதலான உதவி கிடைப்பதற்கு நான் பரிந்துரை செய்வேன்.
காணாமல் போனோர் விவகாரம், தமிழ் அரசியல் கைதிகளின் விடயம் தொடர்பில் வெள்ளிக்கிழமை அரசதரப்பினரை சந்திக்கும் போது அவர்களின் பதிலைக் கோருவேன்.
நாடு திரும்பியதும் ஐ.நா. மனித உரிமை பேரவையில் முன்னுரிமை கொடுத்து இந்த விடயங்கள் குறித்து நடவடிக்கை மேற்கொள்வேன் என்று தெரிவித்தார்.
இதேபோல் கேப்பாப்பிலவு மக்கள் மத்தியில் குறைபாடுகளை கேட்டபின்னர் கருத்துத் தெரிவித்த நவநீதம்பிள்ளை, காணாமல் போனோரது உறவினர்களான நீங்கள் படும் துயரத்தை நான் புரிந்து கொண்டேன்.
காணி அபகரிப்பு விடயத்திலும், விடயங்களை உறுதிப்படுத்திக் கொண்டேன்.
இவ்விடயங்கள் தொடர்பில் ஐ.நா. மனித உரிமைப் பேரவையில் முக்கியத்துவம் வழங்குவேன் என்று சுட்டிக்காட்டியுள்ளார்.
No comments:
Post a Comment
உங்களுடைய கருத்தை தெருவிக்கவும்!
நீங்கள் உங்கள் கருத்தை எழுதும் பொழுது தயவுசெய்து முடிந்தவரை தமிழில் எழுதவும்.