கிழக்கில் மீண்டும் புலிகள் !

[சனிக்கிழமை, 29 மார்ச் 2008,]

கடந்த வாரம் கைவிடப்பட்ட ஐந்து படகுகளை படையினர் வாகரையில் கைப்பற்றியிருந்ததும், அதை ஊடகங்களுக்கு தெரியப்படுத்தாமல் மறைத்ததும் மக்கள் மத்தியில் பெரும் அதிர்வலையை உருவாக்கியிருந்தது.

இப்படகுகளில் வந்து இறங்கியது யார்? என்னும் கேள்வி மக்களை விட இராணுவத்தினரின் நிம்மதியை கெடுத்துள்ளதாக வாகரையை சேர்ந்த ஆசிரியர் ஒருவர் தெரிவித்தார்.

இதில் வந்து இறங்கியது தமிழீழ விடுதலைப் புலிகளின் கொமாண்டோ அணியினர்தான் என்றும் மட்டக்களிப்பு மாவட்ட புதிய தளபதி கீர்த்தியின் துணை தளபதிகளில் ஒருவரான சாந்தன் என்பவருடன் இப்படையணி வாகரைக்கு வந்து இறங்கியதாகவும் தெரியவருகிறது.

அதே நாள் மட்டக்களப்பை நோக்கி அப் படையணி நகர்ந்து, அங்கு முன்னதாகவே மதனுடன் நின்றிருந்த சிறிய படையணியுடன் இணைந்துள்ளதாகவும், இவர்கள் இரவு பகல் என்று பாராது காஞ்சிரங்குடா, வாழைக்காலை பகுதிகளில் நடமாடி பாதுகாப்பு நிலைமைகளை ஆராய்ந்து வருவதாகவும், மக்கள் அவர்களை அரவணைத்து வருவதாகவும் தெரிய வருகிறது.

இதனை உறுதிப்படுத்துவது போன்று, கடந்த 26 இல் இடம்பெற்ற இலங்கை அதிரடிப் படை அதிகாரிகளை நோக்கி அதி நவீன முறையில் இடம் பெற்ற கிளேமோர் தாக்குதல் அமைந்திருந்தது.

இது கிழக்கின் விடியலுக்கான போராட்டத்தின் ஆரம்பமா? என மக்கள் மத்தியில் எண்ணம் தோன்றியுள்ளது.

Orunews ♦ ஒரு செய்தி