சிறிலங்கா இராணுவத்தில் மேலும் ஒரு புதிய படைப்பிரிவு

[வெள்ளிக்கிழமை, 08 பெப்ரவரி 2008] சிறிலங்கா இராணுவம் தனது படை பலத்தை அதிகரிக்கும் நோக்குடன் மேலும் ஒரு புதிய படைப்பிரிவினை உருவாக்கத் திட்டமிட்டிருப்பதாக இராணுவ வட்டாரங்கள் தெரிவித்துள்ளன. இது தொடர்பில் இராணுவ வட்டாரங்கள் தெரிவித்துள்ளதாவது: தற்போது இடம்பெற்று வரும் போரில் இராணுவத்தின் பலத்தை மேலும் அதிகரிக்கும் நோக்குடன் புதிய படைப்பிரிவாக 61 ஆவது படைப்பிரிவை உருவாக்கத் திட்டமிடப்பட்டுள்ளது. அதற்கான பயிற்சிகள் தற்போது நடைபெற்று வருகின்றன. எனினும் இந்தப் படைப்பிரிவின் கட்டளைத் தளபதி மற்றும் தலைமையகம் போன்றவை தொடர்பாக இதுவரை முடிவு செய்யப்படவில்லை. இராணுவத்தினருக்கு மேலும் படையினரைச் சேர்க்கும் முயற்சிகளும் நடைபெற்று வருகின்றன. கடந்த வருடம் 30,000 சிங்கள இளைஞர்கள் இராணுவத்தில் இணைந்துள்ளனர். இந்த வருடம் மேலும் 15,000 பேரை சேர்க்கத் திட்டமிடப்பட்டுள்ளதாக இராணுவ வட்டாரங்கள் தெரிவித்துள்ளன. இதனிடையே கடந்த வருடம் 57, 58, 59 ஆகிய புதிய படைப்பிரிவுகளையும் கவசத் தாக்குதல் றெஜிமென்ட், 9 ஆவது கவச றெஜிமென்ட் என்பன உட்பட பல றெஜிமென்டகளையும் இராணுவம் உருவாக்கியிருக்கும் நிலையில் தற்போது மேலும் ஒரு புதிய படைப்பிரிவினை உருவாக்கத் திட்டமிட்டு வருவது குறிப்பிடத்தக்கது. புதினம்.கொம்.