சிறீபதியின் வாகன விபத்தினைத் தொடர்ந்து அங்கு வெடிச்சத்தங்கள் கேட்டன: ஐ.தே.க.

[ஞாயிற்றுக்கிழமை, 10 பெப்ரவரி 2008] அனுராதபுரம் பகுதியில் இடம்பெற்ற நாடாளுமன்ற உறுப்பினர் சிறீபதி சூரியாராச்சியின் வாகன விபத்தில் சந்தேகம் ஏற்பட்டுள்ளதாகவும், விபத்தினைத் தொடர்ந்து அப்பகுதியில் துப்பாக்கி வெடிச்சத்தங்கள் கேட்டதாகவும் ஐக்கிய தேசியக் கட்சி தெரிவித்துள்ளது. இது தொடர்பில் அக்கட்சியின் முக்கிய உறுப்பினர் லக்ஸ்மன் கிரியெல்ல தெரிவித்துள்ளதாவது: அனுராதபுரம் பகுதியில் நேற்று சனிக்கிழமை இடம்பெற்ற வாகன விபத்தில் நாடாளுமன்ற உறுப்பினர் சிறீபதி சூரியாராச்சியும், அவரது மெய்ப்பாதுகாவலர்களும் கொல்லப்பட்டதில் சந்தேகம் ஏற்பட்டுள்ளது. இந்த விபத்தில் சதி நடவடிக்கைகள் இடம்பெற்றுள்ளதாக நாம் நம்புகிறோம். ஏனெனில் விபத்தினைத் தொடர்ந்து அந்தப் பகுதியில் துப்பாக்கி வெடிச்சத்தங்களும், குண்டுச் சத்தமும் கேட்டதாக அப்பகுதி மக்கள் தெரிவித்துள்ளனர். அதனைத் தொடர்ந்து எமது கட்சி அப்பகுதி கட்சி ஆதரவாளர்களிடம் விசாரணைகளை மேற்கொண்டிருந்தது. துப்பாக்கி வேட்டுச் சத்தங்களும், குண்டுச்சத்தமும் கேட்டதாக அவர்களும் தெரிவித்துள்ளனர். எனினும் உண்மையில் என்ன இடம்பெற்றது என்பது தொடர்பாக எம்மால் எதனையும் தற்போது தெரிவிக்க முடியாது. சிறீபதி சூரியராச்சியின் வாகனம் வேகமாக சென்றாலும் அது பிரதான வீதியில் இருந்து விலகி வேறு ஒரு பொருளுடன் மோதி எவ்வாறு மூன்று பேருக்கு மரணத்தை எற்படுத்தி உள்ளது என்பதையும் புரிந்து கொள்வது கடினமானது என்றார் அவர். புதினம்.கொம்