மன்னார் பாலைக்குழி- அடம்பன் களமுனைகளில் 21 படையினர் பலி- 20 பேர் காயம்

[சனிக்கிழமை, 09 பெப்ரவரி 2008] மன்னார் அடம்பன் முன்நகர்வு முறியடிப்புச் சமர் மற்றும் தமிழீழ விடுதலைப் புலிகளின் குறிசூட்டுத் தாக்குதல்கள் ஆகியவற்றில் 21 படையினர் கொல்லப்பட்டுள்ளனர். 20 பேர் படுகாயமடைந்துள்ளனர். பாலைக்குழியில் இருந்து அடம்பன் நோக்கி சிறிலங்காப் படையினர் மேற்கொண்ட முன்நகர்வை விடுதலைப் புலிகள் முறியடித்தனர். இதில் 10 படையினர் கொல்லப்பட்டுள்ளதுடன் 20-க்கும் அதிகமான படையினர் காயமடைந்துள்ளனர். பாலைக்குழியில் இருந்து அடம்பன் நோக்கி நேற்று வியாழக்கிழமை முற்பகல் 9:00 மணியளவில் சராமாரியான பல்குழல் வெடிகணை எறிகணை மற்றும் ஆட்டிலெறி எறிகணைச் சூட்டாதரவுடன் படையினர் முன்நகர்வை மேற்கொண்டனர். இம் முன்நகர்வுக்கு எதிராக விடுதலைப் புலிகள் நேற்று மாலை 3:00 மணிவரை நடத்திய முறியடிப்புத் தாக்குதலில் 10 படையினர் கொல்லப்பட்டுள்ளதுடன் 20-க்கும் அதிகமான படையினர் காயமடைந்துள்ளனர். இழப்புக்களுடன் விரட்டியடிக்கப்பட்ட படையினரிடமிருந்து விடுதலைப் புலிகளால் ஆயுதங்கள் கைப்பற்றப்பட்டுள்ளன. கைப்பற்றப்பட்ட ஆயுத விபரம்: ஏகெஎல்எம்ஜி ரவைக்கூடுதாங்கி அணி - 01 பிகேஎல் எம்ஜி ரவைக்கூடுதாங்கி அணி - 01 தலைகவசம் - 01 குண்டு - 01 பிகேஎல்எம்ஜி இணைப்புக்களுடன் ரவைகள் - 700 ஏகேஎல்எம்ஜி இணைப்பிகளுடன் ரவைகள் 500 என்பன விடுதலைப் புலிகளால் கைப்பற்றப்பட்டுள்ளன. மேலும் மன்னார் அடம்பன் பகுதியில் விடுதலைப் புலிகள் நடத்திய குறிசூட்டுத் தாக்குதல்களில் 11 படையினர் கொல்லப்பட்டுள்ளனர்.