சிறிலங்காவுக்கு தொடர்ந்து இராணுவ பயிற்சி மற்றும் உதவி வழங்குகிறோம்: இந்திய தலைமை தளபதி தீபக் கபூர்

[ஞாயிற்றுக்கிழமை, 28 ஒக்ரோபர் 2007] சிறிலங்காவுக்கு தொடர்ந்து இராணுவப் பயிற்சி மற்றும் உதவிகளை வழங்குகிறோம் என்று இந்திய இராணுவத் தலைமை தளபதி தீபக் கபூர் தெரிவித்துள்ளார். புதுடில்லியில் ஊடகவியலாளர்களிடம் நேற்று சனிக்கிழமை அவர் கூறியதாவது: சிறிலங்கா அரசுடன் இந்தியா நல்லுறவு கொண்டு உள்ளது. அங்கு நீடித்து வரும் இனப் பிரச்சினையை கட்டுப்படுத்துவதற்கான அனைத்து நடவடிக்கைகளையும் சிறிலங்கா அரசு எடுத்து வருகிறது. சிறிலங்காவுடன் இந்தியா கொண்டுள்ள நல்லுறவின் அடிப்படையில், அந்த நாட்டு இராணுவத்துக்கு இந்தியா முந்தைய காலங்களில் அளித்து வந்த இராணுவப் பயிற்சியை இப்போதும் தொடர்ந்து அளித்து வருகிறது. அந்த நாடு ஆயுத உதவி அளிக்கும்படி பலமுறை வேண்டுகோள் விடுத்தது. அதன் அடிப்படையில் சிறிலங்காவுக்கு வான்வெளி தாக்குதலை எதிர்த்து போரிடும் நவீன துப்பாக்கிகள் பீரங்கிகள் வழங்கப்பட்டு உள்ளன என்றார் அவர்.