இணைந்த வடக்கு - கிழக்கே தமிழர் தாயகமென்பதில் கிழக்கு மக்கள் மிகவும் உறுதியாகவுள்ளனர்
ஜெயானந்தமூர்த்தி எம்.பி. கூறுகிறார்
வடகிழக்கு மாகாணத்தைப் பிரித்து வடக்குக்கு வேறாகவும் கிழக்குக்கு வேறாகவும் இரு நிர்வாக அலகுகள் அமைக்கப்பட்டுள்ளதுடன் திருகோணமலை மாவட்டத்தை மாத்திரம் கிழக்கிலிருந்து வேறாக்கி தனி நிர்வாக அலகு உருவாக்கப்பட்டுள்ள செயலானது பெரும் சந்தேகத்தை ஏற்படுத்தியுள்ளதுடன் தமிழர் தாயகத்தைத் துண்டாடும் சிங்கள பேரினவாதத்தின் ஒரு திட்டமிட்ட செயலாகுமென தமிழ் தேசியக் கூட்டமைப்பின் மட்டக்களப்பு மாவட்ட பாராளுமன்ற உறுப்பினர் எஸ். ஜெயானந்தமூர்த்தி தெரிவித்துள்ளார்.
இது தொடர்பாக அவர் விடுத்துள்ள அறிக்கையில் தெரிவித்துள்ளதாவது;
தமிழ் மக்களின் அரசியல் அபிலாஷைகளை நிறைவேற்றவென்றே மாகாண சபை முறைமை அறிமுகப்படுத்தப்பட்டது. 1987 ஆம் ஆண்டு அப்போதைய ஜனாதிபதி ஜே.ஆர். ஜெயவர்த்தனவும் இந்தியப் பிரதமர் ராஜீவ் காந்தியும் செய்துகொண்ட இலங்கை - இந்திய ஒப்பந்தத்தின் கீழ் தமிழ் மக்களுக்கு அதிகாரப் பகிர்வு வழங்கப்பட வேண்டும் என்ற வகையில் மாகாண சபை முறைமை கொண்டுவரப்பட்டது.
இதன் பிரகாரம், தமிழர் தாயகமான வடக்குக் கிழக்கு மாகாணங்கள் ஒன்றிணைக்கப்பட்டு வடகிழக்கு மாகாண சபை உருவாக்கப்பட்டது.
ஆனால், அந்த மாகாண சபைத் திட்டம் கூட, யாருடைய பிரச்சினையைத் தீர்ப்பதற்காக முன்வைக்கப்பட்டதோ அதன்படி தமிழர்களின் பிரச்சினையைத் தீர்க்கும் வகையில் அது செயற்படவில்லை. மாறாக, வடகிழக்கு மாகாணத்தைத் தவிர, ஏனைய பகுதியில் தான் அது சிறப்பாக அமைந்தது.
இந்நிலையில், வடகிழக்கு மாகாண சபைக்கு சிங்கள ஆளுநர் நியமிக்கப்பட்டு அரசின் நேரடிக் கண்காணிப்பில் அது இயங்கியதுடன் தமிழ் மக்களின் எந்தவொரு அபிலாஷையினையும் இம்மாகாண சபை நிறைவேற்றவில்லை. இதனால், மாகாண சபை முறையில் தமிழ் மக்கள் நம்பிக்கை இழந்தவர்களாக இருந்தனர்.
இந்த வகையில் வடகிழக்குத் தாயகத்தை கூறுபோடும் சிங்கள பேரினவாதத் திட்டத்தின்படி ஜனாதிபதி மகிந்த ராஜபக்ஷவின் அனுசரணையுடன் வடகிழக்கு மாகாணம் இரு மாகாணங்களாக பிரிக்கப்பட்டு தற்போது அதற்கான அனைத்து நடவடிக்கைகளும் எடுக்கப்பட்டு எதிர்வரும் ஜனவரி மாதத்துடன் நிர்வாக அலகுகள் இயங்கவுள்ளன.
எனினும், கிழக்கு மாகாணத்திலிருந்து திருகோணமலை மாவட்டம் தனி அலகாகப் பிரிக்கப்பட்டு தனி நிர்வாக அலகு உருவாக்கப்பட்டுள்ளது. இது தமிழர் தாயகத்தைத் துண்டாடும் பாரிய சதி என்பதுடன் தமிழர் தாயகத்தின் தலைநகரை சிங்கள மயமாக்கும் ஒரு நடவடிக்கையாகவும் உள்ளது.
அரசின் இந்த நடவடிக்கையானது, எதிர்காலத்தில் பாரிய விளைவுகளை ஏற்படுத்தும் என்பதுடன் திருகோணமலை மாவட்டத்தை எதிர்காலத்தில் வடமத்திய மாகாணத்துடன் இணைத்தாலும் ஆச்சரியப்படுவதற்கில்லை. இதனால், அரசு தற்போது அவசர அவசரமாக வடகிழக்கு மாகாணத்தைத் துண்டாடி மூன்று நிர்வாக அலகுகள் அமைத்துள்ள நடவடிக்கையானது பெரும் சந்தேகத்தை ஏற்படுத்தியுள்ளது.
அத்துடன், தற்போதைய இனப்பிரச்சினைத் தீர்வானது இதனால், இன்னும் மோசமடையக் கூடிய நிலையே தோன்றும் என்பதுடன் இலங்கை - இந்திய ஒப்பந்தத்தை ஏற்படுத்திய பிரதான சக்தியான இந்தியாவின் நோக்கத்தையும் சிதறடிக்கும் செயலாகவும் உள்ளது.
ஏனெனில், வடகிழக்கு மாகாணம் இணைந்திருக்க வேண்டும் என்பதையே தற்போதும் இந்தியா வலியுறுத்தி வருகின்றது. இதை இந்திய பிரதமர் மன்மோகன் சிங், இலங்கை ஜனாதிபதி மகிந்த ராஜபக்ஷவிடம் அண்மையில் வலியுறுத்தியிருந்தார்.
அத்துடன், தமிழ் மக்களின் எந்தவொரு கருத்தும் கேட்டறியப்படாமல் இவ்வாறு வடகிழக்கு மாகாணம் கூறுபோடப்படுவதை தமிழ் மக்கள் முற்றாக எதிர்த்துள்ளதுடன் கிழக்கு மாகாண மக்கள் இணைந்த வடகிழக்குத் தாயகமே தமது பூர்வீகத்தாயகம் என்பதில் உறுதியாக உள்ளதுடன் வடகிழக்கு இணைந்தே இருக்க வேண்டும் என்பதில் அவர்கள் உறுதியாக உள்ளனர் என்றும் தெரிவித்துள்ளார்.
அமெரிக்காவின் நோர்மன் விருது பெற்றுள்ள முதல் இலங்கையர்
[31 - December - 2006]
அமெரிக்கன் சொசைட்டி ஒவ் சிவில் எஞ்ஜினியர்ஸினால் (ASCE) வழங்கப்படுகின்ற மிகவும் கௌரவத்திற்குரிய நோர்மன் விருதினை (Norman Medal) இவ்வாண்டு யாழ்ப்பாணம் வட்டுக்கோட்டையைச் சேர்ந்த கலாநிதி இராமச்சந்திரன் குலசிங்கம் பெற்றிருக்கிறார்.
பூகம்பங்கள் ஏற்படும்போது மண்படைகளின் செயற்பாடு எவ்வாறு இருக்கிறது என்பது தொடர்பில் `ஜியோடெக்னிக்கல் அன்ட் ஜியோ என்வயர்மன்ரல் என்ஜினியரிங்' என்ற சஞ்சிகையில் இவர் எழுதிய ஆய்வுக் கட்டுரைக்காகவே இந்த விருது வழங்கப்பட்டிருக்கிறது. கலிபோர்னியாவின் நீர்வளங்கள் திணைக்களத்தைச் சேர்ந்த எரிக் ஜே.மல்விக் மற்றும் கலிபோர்னிய பல்கலைக்கழக (டேவிஸ்) பேராசிரியர் றொஸ் டபிள்யூ.பௌலாங்கர் மற்றும் புரூஸ் எல்.குட்டர் ஆகியோருடன் இணைந்தே குலசிங்கம் இந்த விருதினைப் பெறுகிறார்.
சிவில் மற்றும் ஜியோடெக்னிக்கல் பொறியியல் துறையில் ஏறத்தாழ ஒரு தசாப்த கால அனுபவத்தைக் கொண்டுள்ள கலாநிதி குலசிங்கம் ஜியோசின்டெக் நிறுவனத்தில் பொறியியலாளராக பணியாற்றுகிறார்.
நோர்மன் விருது வழங்கலின் 132 வருடகால வரலாற்றில் ஒரு இலங்கையர் இவ்விருதினைப் பெறுவது இதுவே முதன்முறையாகும்.
வட்டுக்கோட்டை யாழ்ப்பாணக் கல்லூரியின் பழைய மாணவரான இவர் அங்கிருந்து பேராதனைப் பல்கலைக்கழகத்துக்கு தெரிவானார். அங்கு சிவில் பொறியியல் துறையில் முதல் வகுப்பில் சித்திபெற்று, பின்னர் கலிபோர்னியா பல்கலைக்கழகத்துக்கு (டேவிஸ்) பட்டப்பின் படிப்புக்காக சென்றிருந்தார். யாழ்ப்பாணக் கல்லூரியின் கிரிக்கெட் அணியிலும் பின்னர் பேராதனைப் பல்கலைக்கழக கிரிக்கெட் அணியிலும் மிகச் சிறந்த ஒரு துடுப்பாட்ட வீரராக இவர் தடம் பதித்திருக்கிறார் என்பதும் குறிப்பிடத்தக்கது. இவர் வட்டுக்கோட்டை இராமச்சந்திரன் - பாலேஸ்வரி தம்பதியரின் புதல்வராவார்.
நோர்மன் விருதானது, முதன் முதலில் 1872 ஆம் ஆண்டு ஜோர்ஜ் எச்.நோர்மன் என்பவரால் அறிமுகப்படுத்தப்பட்டது. பொறியியல் விஞ்ஞானத்துறையின் வளர்ச்சிக்கு சிறந்த பங்களிப்பினை வழங்குபவர்களுக்கே இந்த விருது வழங்கப்பட்டு வருகிறது.
குலசிங்கம் பொறியியலாளராக பணியாற்றுகின்ற ஜியோசின்டெக் நிறுவனமானது, நோர்மன் விருதை வழங்குகின்ற அமெரிக்கன் சொசைட்டி ஒவ் சிவில் எஞ்ஜினியர்ஸின் ஒரு அங்கத்துவ நிறுவனமாகும். ஜியோசின்டெக் நிறுவனமானது அமெரிக்க மற்றும் சர்வதேச ரீதியாக பொறியியல் துறை ஆலோசனை மற்றும் விஞ்ஞான சேவைகளை வழங்குகிறது.
இச்சந்திப்பு தொடர்பாக எமது "புதினம்" சிறப்பு செய்தியாளருக்கு தமிழ்த் தேசியக் கூட்டமைப்பு குழுவினர் அளித்த நேர்காணல்:
இந்திய பிரதமர் மன்மோகன்சிங்கிடம் ஈழத் தமிழர்களின் துயரங்களை விளக்கினோம்.
இச்சந்திப்பு 45 நிமிட நேரம் நடைபெற்றது.
நாங்கள் முன்வைத்த வேண்டுகோள்கள் அனைத்தும் நியாயமானவைதான் என்று இந்தியப் பிரதமர் எம்மிடம் தெரிவித்தார். மேலும் வடக்கு-கிழக்கு பிரிக்கப்படக்கூடாது என்பதில் இந்தியா உறுதியாக இருக்கிறது என்றும் மன்மோகன்சிங் தெரிவித்தார்.
இலங்கையில் வாழும் தமிழர்கள் கெளரவத்தோடும் கண்ணியத்தோடும் பாதுகாப்பாகவும் வாழ வேன்டும் என்பதுதான் இந்தியாவின் நிலைப்பாடு. அண்மையில் இந்தியா வந்திருந்த சிறிலங்கா அரச தலைவர் ராஜபக்சேவிடமும் இதனைத் வலியுறுத்தியிருக்கிறோம் என்றும் இந்தியப் பிரதமர் எம்மிடம் தெரிவித்தார்.
இந்தியப் பிரதமருடனான எமது சந்திப்பானது ஒரு திருப்புமுனையாகும் என்றனர் அவர்கள்.
இச்சந்திப்பின் போது இந்திய பிரதமரின் முதன்மை ஆலோசகர் எம்.கே. நாராயணன், வெளிவிவகார அமைச்சு செயலாளர் சிவசங்கர் மேனன் ஆகியோர் உடனிருந்தனர்.
புதினம்.com
தமிழ்த் தேசியக் கூட்டமைப்பின் சிறிலங்கா நாடாளுமன்ற உறுப்பினர்களாகிய இரா.சம்பந்தன், மாவை சேனாதிராஜா, சுரேஸ் பிரேமச்சந்திரன் ஆகியோர் ஊடகவியலாளர்களிடம் கூறியதாவது:
இலங்கையில் உள்ள 5 கட்சிகளின் தலைவர்கள் மற்றும் பொதுச்செயலாளர்கள் உள்ளடங்கிய குழுவினர் தமிழகத்துக்கு நேற்று செவ்வாய்க்கிழமை வருகை தந்தோம்.
நாங்கள் முன்னர் பலமுறை இந்திய நாட்டுக்கு வந்திருக்கிறோம். மத்திய அரசாங்கம் வரை சென்று பல விடயங்கள் பேசியுள்ளோம்.
இலங்கையில் தமிழர் பகுதிகளில் வாழும் தமிழ் பேசும் மக்களின் துன்பங்களை தமிழக முதல்வரிடம் எடுத்துச் சொல்ல விரும்பினோம். அதனை முதல்வருக்கு நாம் தெரிவித்த போது அதற்குரிய வாய்ப்பை எமக்கு இன்று முதல்வர் அளித்தார். முதல்வர் இல்லத்தில் இன்றைய சந்திப்பு நடைபெற்றது.
தமிழக முதல்வர் அவர்களுக்கும் தமிழக மக்களுக்கும் நாங்கள் நன்றி சொல்லக் கடமைபட்டுள்ளோம்.
தமிழ்த் தேசிய இன விடுதலைப் போராட்டமானது இலங்கையில் அமைதி வழிப் போராட்டமாக 50 ஆண்டு காலத்துக்கும் மேலாக நடைபெற்றது. ஆனால் சிங்களப் பேரினவாத அரசாங்கங்கள் மற்றும் இராணுவத்தினால் அந்த அமைதி வழிப் போராட்டத்தை ஆயுதமுனையில் அடக்க முயற்சித்தனர். இனப்படுகொலைகள் நிகழ்த்தப்பட்டன. 1983 ஒகஸ்ட் 16 ஆம் நாள் அன்றைய இந்திய பிரதமர் இந்திரா அம்மையார், இந்திய நாடாளுமன்றத்தில் "இலங்கையில் இனப்படுகொலை நடைபெறுவதாக" கண்டனம் தெரிவித்தார்.
இலங்கையில் பாரம்பரியமாக வாழும் தமிழ்த் தேசிய இனத்தின் மீது மிகப் பயங்கரமான முறையில் ஒடுக்குமுறை கட்டவிழ்த்து விடப்பட்டுள்ளது.
இலங்கையின் கிழக்கு மாகாணத்தில் வாகரை, கதிரவெளி பிரதேசங்களில் 40 ஆயிரத்துக்கும் மேற்பட்ட மக்களும்
யாழ்ப்பாண குடாநாட்டுக்குள் 6 இலட்சம் மக்களும்
உணவின்றி மருத்துவ வசதியின்றி அகதிகளாக வாழும் நிலைக்குத் தள்ளப்பட்டுள்ளனர்.
கிளிநொச்சியில் ரூ. 5 முதல் 8 வரை விற்பனையாகும் 1 முட்டையானது யாழ்ப்பாணத்தில் ரூ. 60 முதல் 70 வரை விற்கப்படுகிறது.
ரூ. 1 கொடுத்து ஒரு பொருளை வாங்கக்கூட மக்களுக்கு வழியில்லாத நிலை ஏற்பட்டுள்ளது.
யாழ்ப்பாணத்துக்கு 1 இலட்சம் 25 ஆயிரம் டீசல் நாளொன்றுக்கு தேவை. இதனை தொடர்ந்து கடல் மூலம் அனுப்பி வைக்க முடியாது.
யாழ்ப்பாணத்தில் மீன்பிடித்தல் முற்றாகத் தடை செய்யப்பட்டுள்ளது.
யாழ்ப்பாண மக்களுக்கான தேவையான பொருட்களை அனுப்பி வைக்காமல் இத்தனை தொன் அனுப்பினோம் அத்தனை தொன் அனுப்பினோம் என்று மகிந்த ராஜபக்ச அரசாங்கம் கூறி வருகிறது.
யாழ்ப்பாணத்துக்கான ஏ-9 தரைவழிப் பாதையை சிறிலங்கா அரசாங்கமானது மூடி வைத்திருப்பதால் பட்டினிச் சாவுக்கு அந்த மக்கள் ஆளாகும் நிலைமை ஏற்படுத்தப்பட்டுள்ளது.
இது தொடர்பாக மகிந்த ராஜபக்சவை எமது தமிழ்த் தேசியக் கூட்டமைப்பினர் பலமுறை நேரில் வலியுறுத்தினோம். வெளிநாட்டுத் தூதுவர்கள், ஐக்கிய நாடுகள் சபையின் பிரதிநிதிகள் ஆகியோரிடமும் நாம் வலியுறுத்தினோம். அவர்களும் வேண்டுகோள் விடுத்தும் பாதை திறக்கப்படவில்லை. அதனால் மக்களுக்கு போதிய உணவு மற்றும் மருத்துவ வசதி கிடைக்கவில்லை.
அதே நேரத்தில் சிறிலங்கா அரசாங்கம் தனது இராணுவ நடவடிக்கைகளத் தீவிரப்படுத்தியுள்ளது.
நாளாந்தம் 30 முதல் 50 பேர் வரையில் படுகொலை செய்யப்படுகின்றனர்.
மகிந்த ராஜபக்ச ஆட்சிக்கு வந்த பின்னர் 14 ஆயிரத்துக்கும் மேற்பட்டோர் தமிழகத்துக்கு கடலில் ஏற்படும் உயிராபத்துகளை பொருட்படுத்தாமல் பாதுகாப்பு தேடி வந்துள்ளனர்.
இதுவரை உள்நாட்டிலேயே 2.5 இலட்சம் பேர் அகதிகளாக இடம்பெயர்ந்துள்ளனர்.
தமிழ் மக்களுக்கு கொஞ்சம் கூட சிறிலங்கா அரசாங்கத்தால் பாதுகாப்பு வழங்க முடியாது. சிறிலங்கா அரசாங்கத்தின் மீது நம்பிக்கை இல்லாமல்தான் பாதுகாப்புக்காக தமிழகத்துக்கும் வெளிநாடுகளுக்கும் அகதிகளாக தமிழ் மக்கள் ஓடுகின்றனர்.
தமிழீழ விடுதலைப் புலிகளுடன் 2002 பெப்ரவரி மாதம் போர் நிறுத்த ஒப்பந்தத்தை சிறிலங்கா அரசாங்கம் செய்து கொண்டது. ஆனால் அந்த ஒப்பந்தத்தை மதிக்காமல் தமிழீழ விடுதலைப் புலிகளை இராணுவ ரீதியாக அடக்கி ஒடுக்கவே அரசாங்கம் செயற்படுகிறது.
இந்த 4 வருட போர் நிறுத்த ஒப்பந்தகாலத்தில் எந்த ஒரு சிறு உதவியும் கூட தமிழ் மக்களுக்குக் கிடைக்கவே இல்லை.
தமிழ் மக்களுக்கான இடைக்கால நிர்வாக அமைப்பும் கூட உருவாக்கப்படவில்லை.
இலங்கையின் வடக்கு கிழக்கானது தமிழ் மக்களின் பாரம்பரிய பிரதேசம். இந்தியாவிலே சீக்கியர்களுக்கும் மலையாளிகளுக்கும் எப்படி பஞ்சாப்பும் கேரளமும் தாயகமோ அதுபோல் இலங்கையின் வடக்கு - கிழக்கு மாகாணமானது எமது தாயகம். அங்கே சிறிலங்காவின் சுதந்திரத்துக்கு முன்பாக சிங்களவர் எண்ணிக்கை மிகக் குறைவாகத்தான் இருந்தது. ஆனால் குடியேற்றத்தால் இப்போது எண்ணிக்கை அதிகரிக்கப்பட்டுள்ளது.
கிழக்கில் உள்ள திருகோணமலையிலிருந்து முற்று முழுதாக தமிழ் மக்களை வெளியேற்றும் வகையிலேயே சிறிலங்கா இராணுவம் செயற்பட்டு வருகிறது. தமிழ் மக்களை முற்றாக திருகோணமலையிலிருந்து வெளியேற்றி விட்டு அதன் பின்னர் அப்பிரதேசத்தில் உள்ள மட்டக்களப்பு, அம்பாறையிலும் தமிழர்களை வெளியேற்றி பௌத்த சிங்களமயமாக்கும் நடவடிக்கைகளையே சிறிலங்கா மேற்கொண்டு வருகிறது.
தமிழ்நாட்டுக்கு அகதிகளாக வந்துள்ளோரில் பெரும்பாலானோர் திருகோணமலையைச் சேர்ந்த தமிழர்கள்தான்.
இந்திய-இலங்கை உடன்பாட்டின் கீழ் தமிழர் தாயக பிரதேசங்களான வடக்கும் கிழக்கும் இணைக்கப்பட்டு ஒரே மாகாணமாக- ஒரே அலகாக உருவாக்கப்பட்டது.
கடந்த 18 ஆண்டு காலமாக நடைமுறையில் இருந்து வந்ததை 100 விழுக்காடு சிங்களவர்களே உள்ள சிறிலங்காவின் உச்சநீதிமன்றம் அண்மையில் வடக்கு - கிழக்கு இணைப்பு முறை செல்லாது என்று அறிவித்துவிட்டது.
முன்னர் ஆழிப்பேரலையால் பாதிக்கப்பட்டபோது பொதுக்கட்டமைப்பு உருவாக்கப்பட வேண்டும் என்று சர்வதேச நாடுகள் முயற்சித்தன. ஆனால் பொதுக்கட்டமைப்பும் சட்டவிரோதமானது என்று இதே உச்சநீதிமன்றம் தீர்ப்பளித்தது.
சிறிலங்காவின் நீதிமன்றமானது சிங்களவர்களுக்கானது.
இந்திய - இலங்கை ஒப்பந்தமானது ஒரு சர்வதேச உடன்படிக்கை. ஆனால் சிறிலங்காவோ எந்த ஒரு உடன்பாட்டையுமே செயற்படுத்தவில்லை.
நாங்கள் கடந்த முறை இந்திய மத்திய அரசாங்கத்தினரை சந்தித்த போது இது விடயமாக விவாதித்தோம். வடக்கு - கிழக்கைப் பிரிக்க அனுமதிக்க மாட்டோம் என்று இந்திய அரசு தெரிவித்தது. ஆனால் இந்திய அரசாங்கத்தின் விருப்பத்தையும் சிறிலங்கா அரசாங்கம் இன்றுவரை நிறைவேற்றவில்லை.
வடக்கு - கிழக்கு மாகாண இணைப்புக்கான சட்ட மூலத்தை நாடாளுமன்றத்தில் அரசாங்கம் தாக்கல் செய்தால் பிரதான எதிர்க்கட்சியான ஐக்கிய தேசியக் கட்சி ஆதரிப்பதாக அறிவித்தது. நாங்கள் தமிழ்த் தேசியக் கூட்டமைப்பும் ஆதரிப்பதாகக் கூறினோம். ஆனால் அதற்கு சிறிலங்கா அரசாங்கம் ஆயத்தமாக இல்லை.
தமிழீழ விடுதலைப் புலிகளை பலவீனப்படுத்துகிறோம் என்று சொல்லிக்கொண்டு தமிழினப் படுகொலை கட்டவிழ்த்து விடப்பட்டுள்ளது.
வடக்கு - கிழக்கில் தமிழர் தாயகப் பகுதியில் நாளாந்தம் படுகொலைகள் நடைபெறுகின்றன.
யாழ்ப்பாணத்தில் நாளைக்கு 50 பேர் காணாமல் போகும் நிலைமை உருவாகி உள்ளது. அண்மையில் 30 இளைஞர்கள் மனித உரிமைகள் ஆணையத்திடம் தஞ்சமடைந்து பாதுகாப்புக்காக சிறைகளிலே வைக்கப்பட்டுள்ளனர்.
யாழ்ப்பாணத்தில் ஊரடங்குச் சட்டம் அமல்படுத்தப்படும் நேரத்தில்தான் படுகொலைச் செயல்கள் நடத்தப்படுகின்றன. ஊரடங்குச் சட்டம் அமுலில் உள்ள போது இராணுவம் மற்றும் துணைப் படையினரே நடமாடுகின்றனர். ஒரு கொலைக் கலாச்சாரத்தை சிறிலங்கா அரசாங்கம் உருவாக்கியுள்ளது.
திருகோணமலையில் 5 தமிழ் மாணவர்கள் படுகொலை செய்யப்பட்டனர்.
மூதூரில் சர்வதேச அரச சார்பற்ற நிறுவனத்தின் 17 பணியாளர்கள் படுகொலை செய்யப்பட்டனர்.
கடந்த ஓராண்டில் எமது கூட்டமைப்பின் 2 நாடாளுமன்ற உறுப்பினர்கள் படுகொலை செய்யப்பட்டனர். பத்திரிகையாளர்கள், கல்வியாளர்கள் என அனைத்துத் தரப்பினரும் இராணுவத்தாலும் அவர்களுடன் இணைந்துள்ள துணைப்படையினராலும் படுகொலை செய்யப்படுகின்றனர். ஆனால் இந்தப் படுகொலை தொடர்பில் ஒருவர் கூட கைது செய்யப்படவில்லை.
தமிழ் மக்களை படுகொலை செய்து கொண்டே மறுபக்கத்திலே பேச்சுவார்த்தை தயார் என்று கூறி சர்வதேச நாடுகளை சிறிலங்கா அரசாங்கம் முட்டாளாக்குகிறது.
தமிழர் தாயகத்தை பிளவுபடுத்தி வடக்கு - கிழக்கு மக்களை பிளவுபடுத்தி தமிழர் விடுதலைப் போராட்டத்தை பலவீனப்படுத்தவே சிறிலங்கா அரசாங்கம் செயற்படுகிறது.
எமது தாயகமான இலங்கையின் வடக்கு - கிழக்கில் நாம் சுதந்திரமாக வாழ விரும்புகிறோம்.
பேச்சுவார்த்தைகள் தமிழ் மக்களுக்கு எதனையுமே வழங்காத நிலையில் நாங்கள் தொடர்ந்தும் பேசுவதில் பயனில்லை.
சிறிலங்கா அரசாங்கத்தில் கடும் போக்காளர்களே உள்ளனர். மகிந்த ராஜபக்சவின் தம்பி கோத்தபாய ராஜபக்ச மிகக் கடும் போக்காளர். ஜே.வி.பி., ஜாதிக ஹெல உறுமய போன்றவை சிங்கள தீவிரவாத இயக்கங்கள்.
தமிழ் மக்களை அழித்தொழிக்கும் சிறிலங்கா அரசாங்கத்தின் அடாவடித்தனங்களுக்கும் காட்டுமிராண்டித்தனத்துக்கும் முற்றுப்புள்ளி வைக்க வேண்டும்.
தமிழ் மக்களையும் தமிழீழ விடுதலைப் புலிகளை அழித்து முழு இலங்கையையும் பௌத்த சிங்கள நாடாக மாற்ற வேண்டும் என்ற ஒரே இலக்கோடு மட்டுமே சிறிலங்கா அரசாங்கம் செயற்படுகிறது.
இலங்கையில் அரச பயங்கரவாதம் கட்டவிழ்த்து விடப்பட்டுள்ளமை குறித்து சர்வதேச சமூக நாடுகளுக்கும் நாம் எடுத்துக் கூறினோம். ஆனால் அந்நாடுகள் கைவிரித்து விட்டன.
ஆகையால் இயல்பாகவே யார் எங்களுக்கு தஞ்சம் அளிக்க வேண்டுமோ யார் எங்களுக்குப் பாதுகாப்பு அளிக்க வேண்டுமோ அந்த இந்தியாவுக்கு நாம் மீண்டும் வந்துள்ளோம். தற்போது மக்களால் தெரிவு செய்யப்பட்ட தமிழக முதல்வரான- உலகத் தமிழர்களின் தலைவர் கலைஞர் அவர்களை சந்தித்து எங்கள் மக்களுக்கு பாதுகாப்பு அளிக்க- எங்கள் மக்கள் சாவிலிருந்து தப்பித்து உயிர் வாழ நடவடிக்கை எடுக்குமாறு வலியுறுத்தியுள்ளோம்.
தமிழ் மக்களைப் பாதுகாக்க மத்திய அரசை வலியுறுத்த வேண்டும் என்றும் முதல்வரிடம் கேட்டுக் கொண்டோம். அவர் பேசுவதாகக் கூறியுள்ளார்.
இந்திய அரசாங்கமானது வெற்று அறிக்கைகளோடு நிற்காகமல், வழமையான அறிக்கைகள் போல் இல்லாமல் இலங்கையில் வாழும் தமிழ் மக்கள் சம பிரஜைகளாக நடத்தப்படா விட்டால் சிறிலங்காவின் ஒருமைப்பாடும் ஒற்றுமையும் பாதிப்புக்குள்ளாகும் என்கிற வகையிலான அழுத்தம் அளிக்க வேண்டும். தமிழ் மக்களைப் பாதுகாக்கின்ற வகையிலான அழுத்தங்களை சர்வதேச நாடுகளுடன் ஆலோசித்து செயற்படுத்த வேண்டும் என்று நாங்கள் கேட்டுக்கொள்கிறோம்.
இன்று தமிழக முதல்வரைச் சந்தித்த போல் எதிர்வரும் நாட்களில் தமிழக மற்றும் இந்தியத் தலைவர்களையும் இந்திய அரசாங்க அதிகாரிகளையும் நாம் சந்திக்க உள்ளோம்.
இந்தியாவுக்கும் இலங்கைத் தமிழர்களுக்கும் வரலாற்று ரீதியாக- இனம்,
மொழி மற்றும் கலாச்சார ரீதியாக ஆழமான உறவு உண்டு. நாம் படுகொலை செய்யப்படுகிற போது நீங்கள் வெறுமனே பார்வையாளராக இருக்க முடியாது.
தமிழ் மக்களின் பாதுகாப்பு தொடர்பாக இந்தியா தனது பகிரங்கமாகவும் உறுதியாகவும் தனது நிலைப்பாட்டைச் சொன்னால்தான் தற்போதைய அவல நிலைமை மாறும்.
இந்தியாவால் எதனையும் செய்ய முடியும்.
இலங்கையில் தமிழர்களின் தாயகப் பிரதேசமான வடக்கு கிழக்கில் தமிழர்களே ஆட்சி செய்கிற உரிமையோடு இலங்கைத் தமிழர்கள் சுதந்திரமாகவும் பாதுகாப்பாகவும் வாழ நடவடிக்கைகள் மேற்கொள்ளப்பட வேண்டும் என்று இந்த மண்ணில் வலியுறுத்தவே நாம் வந்துள்ளோம்.
1977 ஆம் ஆண்டு சுதந்திரத் தமிழீழத்தை அமைக்க தமிழ் மக்கள் எங்களுக்கு அங்கீகாரம் அளித்தனர். அந்த இலட்சியத்தை நோக்கியே தமிழீழ விடுதலைப் புலிகள் செயற்பட்டு வருகின்றனர்.
ஆகவே எமது விடுதலைப் போராட்டத்தை இந்திய அரசாங்கமும் இந்திய மக்களும் தமிழக மக்களும் தமிழக அரசாங்கமும் அங்கீகரிக்க வேண்டும் என்று நாங்கள் கோருவதைத் தவிர எமக்கு வேறு வழியில்லை என்றனர் தமிழ்த் தேசியக் கூட்டமைப்பினர்.
